EDITORYAL - Mga kontraktor angay maleksyon

Maayong pakpakan ang mga mayor sa nagkadaiyang local government units nga motan-aw sa inadlaw-adlaw nga kaayohan para sa mas kinabag-an sa ilang konstituwente ug wala lang magtan-aw sa benepisyong makuha gikan aning mga proyektong imprastraktura o mga kaugmaran.

Kini tungod kay daghang mga proyektong imprastraktura ilabi na diha sa kadalanan ang nakahatag man hinuon og problema sa mga tawo ilabi na sa mga motorista tungod sa ilang paglangay-langay og human sa ilang trabaho.

Duna say mga land developers sa mga pribadong kompanya nga nakahasol sa mga residente sa palibot sa ilang site tungod sa dagko nilang mga trak ug ekipo nga nagmugna og problema dala sa abog  ug pagkaguba sa mga karsada ug lapok kun mag-uwan.

Mas pa pa gyud kun hawsyaw ang mga ripraps o retaining walls nga gitukod ug gibutang sa peligro ang kinabuhi sa mga silingang komunidad diha sa ubos.

Usa ka barangay official sa Dakbayan sa Talisay ning bag-o lang, mibahad sa mga kontraktor sa mga proyekto sa gobiyerno diha sa ilang siyudad nga pasakaan sila og kaso kung dili nila paspasan paghuman ang ilang proyekto.

Kahinumdoman nga sa miaging tuig, nahasol ang maong dakbayan sa problema sa traffic nga namugna sa pag-repair sa Mananga Bridge.

Makadaghang higayon miawhag ang mayor sa Department of Public Works and Highways nga maoy nagkuha sa maong kontraktor nga mandoan sila nga padalion ang trabaho.

Karong bag-o, duna na say proyekto nga nakatawag sa atensyon sa maong barangay official diha sa Tabunok, maayo nga mipasidaan kini mopasaka og kaso batok sa kontraktor kun dugay-dugayon paghuman ang proyekto.

Ang mga proyekto sa gobiyerno adunay tagal nga gihatag para humanon sa mga kontraktor. Nakabutang kini sa ilang mga kasabotan tali sa DPWH. Apan makapahibulong nga dunay mga kompanyang wala magtagad ani.

Maayo tingaling ingon niini ang buhaton sa mga LGUs batok aning mga kontraktor nga dili motuman sa mga kontratang ilang gisudlan tali sa gobiyerno, ang pagkiha kanila ug i-ban na sila hangtud sa hangtud nga makaapil sa mga public biddings.