Husto nga lakang

Tukma ang gihimo sa Kongreso nga mitudlo lang sila’g “caretaker” nga morepresentar sa north congressional district sa Cebu City ug wa na magpatawag og special election aron pagpili og mopuli sa pwesto ni Kongresista Raul del Mar.

Si House Speaker Lord Allan Velasco maoy caretaker karon sa Cebu City north congressional district kay namatay na man si Kongresista Del Mar.

Duha ra ang gilatid nga lagda kon mamatay, o kaha dili na makatuman sa katungdanan ang usa ka kongresista. Kini mao ang pagpatawag og special elections, ug ang pagtudlo og caretaker nga usa gihapon ka kongresista.

Nganong dili man angay’ng himoon ang special elections? Kay kon himoon nga mag-special elections mahimong wa nay kapuslanan kon may modaug man.

Maghimo pa og kampanya, dayon mag-election, ug hayan daghan pa nga mga pasikot-sikot, ilabi na ang pag-ihap sa mga botos. Kon himoon ang special elections, magkahulogan na usab kini og laing minilyon nga gasto.

Kon mag-election man, hayan nga lisod ipatuman ang “physical distancing” kay kaliboan ka botante mag-ambahan man gyud sa mga presento aron sa pagbotar.

Pananglit may mapili nga kongresista, magtuon pa siya unsay angay’ng himoon ug sa laktod, ang gamay na lang kaayo niyang maserbisyo dili tukma sa dakong gasto ug kahasol nga mahimo.

Karon nga si Velasco mao na ang caretaker sa Cebu City’s north district, mahimo nga mokonsulta siya ni Kongresista Rodrigo Abellanosa, ug ni Mayor Edgar Labella kon unsay angay’ng himoon.

* * *

Anam-anam na nga gipabalik pagpadagan ang mga tradisyonal nga mga Public Utility Jeepney (PUJ) dinhi sa Dakbayan sa Sugbo.

Unta, kadto lang gyud nga mga makapasar sa road worthiness test maoy tugotan sa pagpabiyahe, ug likayan lang gyud unta ang mga palusot.

Ang kadagkoan sa Land Transportation Franchising and Regulatory Board (LTFRB) ug ang Land Transportation Office (LTO) motan-aw gyud unta pag-ayo sa kondisyon sa mga PUJ nga tugotan nila nga makabalik sa pagpamasahero.

Kanang mga PUJ nga gagmay kaayo ug mag-abot na lang gani ang tuhod sa mga pasahero ug lisud na ang pag-agi sa tunga, dili na gyud kana angay’ng tugotan sa pagpabiyahe.

Ingon man, kinahanglang tan-awon gyud kon hitsas ba sa mga suga, signal lights, brake ug tail lights ang mga sakyanan, ug labaw sa tanan ang PUJ dunay hand brake.

Motuo ba kamo kon ingnon nako nga dihang LTO deputized agent pa ko, daghan ko og nasakpan nga mga PUJ nga way handbrake?

Ubos sa lagda sa Transportation and Traffic Code, ang mga sakyanan nga way handbrake kinahanglan nga tanggongon gyud ug unya na tugotan nga makadagan pagbalik kon mataoran na og hand brake.