EDITORYAL - Komusta ang atong ‘Eninglisan’?

Ang kalidad sa Englis sa mga Pilipino di katupngan sa mga silingang mga nasud kaniadto. Apan sa pagdagan sa panahon, nakaapas na sab sila pinaagi sa pagapil na sa sistema sa ilang edukasyon ang English subjects.

Matud pa sa usa ka international language training company nga Education First, ikaduha ang Pilipinas sa tibuok Asya pag-abot sa English competency, o kamahoan sa paggamit sa pinulongang Englis.

Sunod ang Pilipinas sa Singapore kansang edukasyon gipalambo sab nila og maayo. Apan bisan tuod og naa gihapon sa ikaduhang pwesto sa Asya ang Pilipinas natagak kini og pito ka ang-ang sa global ranking sa English proficiency sa mga kanasuran.

Gikan sa ika-20 nga pwesto sa miaging tuig, karon natagak ang Pilipinas sa ika-27 sa 2020 English Proficiency Index. Gibase kini sa pagkuha og 700 nga puntos diin ang Pilipinas nakuha lamang og 562 puntos.

Nag-una gihapon ang The Netherlands nga nakakuha og 652 puntos samtang ang Singapore nasulod sa ika-10 nga pwesto sa global index pinaagi sa ilang 611 puntos. Niadtong 2016 hangtud 2018 nasulod ang Pilipinas sa top 15 global index. Apan karon natagak. Unsa kahay problema?

Hinuon naa pa gihapon sa “high” ang proficiency band sa Pilipinas. Tungod kay makamao silang mohimo og presentasyton sa trabaho, makasabot sa mga salida sa telebisyon ug makamao ug makasabot sa gibasa nga newspaper nga tanan gigamitan og pinulongang English. Apan karong bag-o, diin ang edukasyon gipaagi sa distance learning gumikan sa pandemiya sa COVID-19 ug dunay mga learning modules nga sayop-sayop ang mga grammars.

Makapaguol nga basin sa sunod tuig motibugsok nasab ang Pilipinas sa global ranking niini. Kun basihan ang maong pagtuon daw kada tuig nagkaus-os ang kalidad sa English proficiency sa mga Pilipino.

Dili unta mawagtang sa mosunod pang mga henerasyon kining English proficiency, tungod kay usa kini sa mga bentaha sa mga Pilipino itandi sa ubang mga nasyolidad ilabi na sa pangempleyo.

Usa sa mga rason kun nganong daghang mga langyaw nga kompanya ang ganahan mokuha og mga Pilipinong trabahante tungod kay makasabot ug makamaong moestorya og Englis.