Mga lagda sa pagpangulo

Ania ang mga basic principles nga angayang kat-onan sa matag lider segun sa panlantaw ni Padre Paking Silva ang maisip natong mahinungdanong haligi sa CEBECO.

1. Maayo moplano sa mga bulohaton ug kalihokan

2. Maminaw ug mokonsulta

3. Bansay sa pagdasig sa mga kaubanan aron sila mamahimong mabuligon

4. Batid sa paghan-ay sa mga kalihukan

5.    Walay hunong pagsukod sa mga accomplishments

6. Tumang pagpangga apan dili magpanuko sa pagtambag ug paghukngay

7. Pagkat-on sa mga prinsipiyo sa mga modelong lider

8. Bulig sa dugang paglig-on ug pagpaubos diha sa kahuyang

9. Bansay sa pagtudlo ug pagpaambit sa iyang kahibalo

10. Makanunayong modayeg sa mga maayong binuhatan.

11. Tinguha niya ang pagpalingkawas sa matag sakop gikan sa iyang kahuyangan.

12. Wala siyay gipinig.

13. Maantigo nga moangkon nga siya nasayop

14. Dili lang magsalig sa iyang posisyon

15. Kinahanglang masayud siya sa iyang approval ug disapproval rating

Dugang pa niini, dili kini mahitungod lang sa efficiency kun ang paghimo sa usa ka butang sa hustong paagi kondili dunay dakong kalabutan usab ang Effectivity kun ang paghimo sa hustong butang. Gani daghan sa mga pangulo ang nag-apas sa resulta apan nahikalimot sila sa bili sa proseso sa matag butang nga ilang pagahimoon.

Sa akong napulog upat na ka mga tuig sa pagpangalagad isip pari akong nakita nga mahinungdanon kaayo ang dialogue of life matag karon ug unya. Nagpasabot kin inga ang constant exposure sa katawhan nga gimong gialagaran dako man kaayo og kahimoan aron mas masayran nimo ang tinud-anay nilang panginahanglan.

Alang kanako, kun imo lamang sud-ongon ang wanang sa pagpangalagad ingon nga relasyon, nan, mas makita nimo ang bili sa kinatibuk-an sa imong kinabuhi ingon nga kinabuhi sa pakigrelasyon sa uban ug sa kinatibuk-an.

Husto si San Agustin sa iyang pag-ingon: For you I am a Bishop, with you I am a Christian! Ning paagiha mas mahimong makahuloganon ang pagtubo sa usag usa isip kaabin sa matag kalamboan.