Mga tam-is handomanan ni Msgr. Jomon

Walay makapugong sa dagan sa panahon. Walay makasanta sa pagsilang sa adlaw hangtod sa pagsalop niini ngadto sa kasadpan.

Sama sa kinabuhi sa tawo, diin kon moabot na gayod ang iyang kinutoban, walay minilyong salapi, tinumping bahandi o banggiitang siyentipiko ang makaharang sa padayong dis-og sa mga gutlo paingon sa pinaling badlis nga gilatid nang daan sa atong Magbubuhat sa usag-usa nato ka mga palad.

Nga sa ato pa, dili diay maayo usikan ang matag gutlo sa atong kinabuhi pinaagi sa pagbuhat og dautan.

Kinahanglang motuman gyod diay ta sa tanan Niyang sugo, sanglit matag adlaw may kalit lang mapagngan sa iyang siga (kinabuhi) bisan wala pa moabot ang kahaponon.

Hinuon, aduna poy makaabot og kahaponon (katigulangon). Sama ni Msgr. Jose ‘Jomon’ S. Montecillo, kinsa misalop sa edad nga 77 sayo sa buntag niadtong Nobiyembre 9, 2020.

Si Msgr. Jomon usa kanhi ka kura paroko sa Archdiocesan Shrine of Our Lady of Guadalupe de Cebu sulod sa daghang katuigan. Kada alas 4:00 sa kaadlawon, mag-Dawn Rosary gyod siya kuyog sa mga lay ministers ug mga parokyano subay sa kadalanan nga naglibot sa simbahan.

Hilig mopakaon si Msgr. Jomon sa iyang isig ka ingon. Aduna siyay naandang adlaw alang sa iyang feeding program para sa gigutom nga mga kabos.

Usab, sa kombento, daghan siyag gipakaon. Kada miting sa lectors, cantors, Parish Pastoral Council ug uban pang ministry, naa gyod nay kaon giandam.

Kay gusto niyang ipasinati-ambit sa tanang mangangalagad ang matuod diwa sa kamanggihatagon.

Unya bisan sa kalisod, nakapatukod pa si Msgr. Jomon og P17 milyones kapin nga kombento, kinsa mihatag og modernong kapuy-an sa kapariang misunod-puli kaniya.

Panahon ni Msgr. Jomon, lisod sudlon ang pagka-lector. Moagi unag seminar sa Sa-Maria ug Cursillo ang aplikante, ayha pa madawat.

Ug ako ning naagian. Diin, naani ang espirituhanong bahandi.

Si Nyor Jomon, atua, gi-recall na sa Ginoo. Apan inig sul-ob nako sa puting garb panahon sa misa, daling manumbalay-pasunding sa akong handurawan kadtong tam-is handomanan nga iyang gibilin sa among kasingkasing.

Ug kinsa bay makalimot sa mga bulawanong hugna nga pirme namong saw-an niadtong nakauban pa siya namo sa pagpangalagad?

Nyor, ayo-ayo sa imong pagpanaw!