Drama didto sa Amerika

Pipila ka adlaw human sa pagkalangay sa iphanay sa mga balota nga mimugma og dakong kontrobersiya, aduna nay migawas nga mananaug sa eleksiyon pagkapresidente sa Estados Unidos.

Ang ulahing talaan sa Associated Press, mipakita nga si Joe Biden ang mananaug sa eleksiyon. Si Biden mikuha og 290 electoral votes, subra sa 270 electoral votes nga kinahanglang kuhaon sa usa ka kandidato. Samtang si reelectionist President Donald Trump mikuha lamang og 214 electoral votes.

Si Biden, ilalum sa Democratic Party, maoy ika-46th nga presidente unya sa Amerika.

Hinuon iyang panundon ang naghitak nga problema sa Estados Unidos nga kabilin sa administrasyon ni Trump, ilabina ang kabahin sa coronavirus disease.

Ambot nganong nagkamuritsing ang agi sa dagan sa piniliay sa pagkapangulo didto sa labing gamhanan nga nasud sa kalibotan.

Sa nakalabay nga mga eleksiyon, pipila ka oras human sa botasyon, mogula na dayon ang mananaug.

Gani, mogawas dayon ang pilderong kandidato aron pag-admiter sa iyang kaparotan ug pag-congratulate sa iyang kaatbang sa kadaugan niini. Ingon niini kadali ug kahapsay kaniadto ang bugnong lugaynon didto sa Amerika.

Apan nausab ang kamada niining nakalabay nga eleksiyon. Kini gumikan usab sa kalangay sa iphanay sa mga botos didto sa ubang mga estado.

Hinungdan nga nakatimaho si Trump og seryoso kuno nga kontrobersiya ug nga mihikay na ang iyang kampo og mga lakang pagdangop sa korte.

Ambot nganong nahitabo kining kalangay pag-ihap sa balota nga hi-tech man unta ang pagpahigayon sa eleksiyon didto.

Hangtod karon, padayong wala mamilok ang kalibotanong komunidad pagsud-ong sa drama mugna sa nadelatar nga vote counting didto sa Estados Unidos.