Mga piloto sa kadalanan

Sigun sa tali sa Cebu City Traffic Office (CCTO) miabot sa 21 ka mga aksidente sa kadalanan ang gikalambigitan sa Ceres Bus dinhi sa dakbayan sa Sugbo sa miaging buwan sa Oktobre ning tuiga.  

Labing uwahi nga disgrasya nga gikalambigitan sa Ceres Bus mao ang panagbangga niini og sa ambulansiya nga gipanag-iya sa Chung Hua Hospital.

Gawas sa dakbayan sa Sugbo nakaligis usab og mga nagbisiklita sa dakbayan sa Mandaue ug sa lalawigan sa Sugbo ang Ceres Bus diin pulos gayod patay ang mga naligsan nga guwardiya ug siklista.

Si Mayor Edgardo Labella naalarma na sa sunod-sunod nga disgrasya nga gikalambigitan sa Ceres Bus hinungdan nga iya nang pakigkitaan ang nagdumala o ang operator sa bus aron mapangutana ug masultian kon unsa na ang nahitabo lagda sa seguridad. Ang mayor nagkanayon nga ang Ceres Bus Company gihatagan og pribilihiyo nga makabiyahi sa ilang mga bus sa dakbayan sa Sugbo hulip sa mga tradisyonal nga mga jeep de pasaheroan panahon ning pandimiya apan gikinahanglan nga sila magmatngon.

Ang tagdumala ug nagpadagan sa Ceres Bus kinahanglan nga pahinumduman sa ilang obligasyon ubos sa balaud mahitungod sa pagkamahinungdanon sa seguridad sa paglabigar sa kadalanan.

Ang Artikulo 1733 sa Codego Civil sa Pilipinas nagkanayon nga ang Common Carriers o mga transportasyon nga pangpubliko basi sa matang sa ilang patigayon ug sa rason nga patakaran nga pang publiko pugos nga motamod sa subra sa ordinaryo nga pagmatngon sa pagbantay sa ilang mga karga ug seguridad sa paghatod sa ilang mga pasahero ngadto sa ilang paingnan. Artikulo 1736 sa mao gihapon nga balaud nagkanayon nga ang responsibilidad nga sobra sa ordinaryo nga pagmatngon sa mga pangpublikong transportasyon molanat gikan sa panahon nga ang kargamento anaa na sa mga kamot sa pangpublikong transportasyon. Molanat kini hangtod madawat na sa gipadad-an o sa tawo nga adunay katungod niini ang kargamento.

Kining maong pahinumdom dili lamang para sa Ceres Bus kun dili apil usab niini ang uban nga pang publikong transportasyon nga ang ilang mga drivers nagtuo nga sila mga piloto kun magpadagan.