Buhata kun unsay gikinahanglan sa kadaghanan

Lahi ang panginahanglan gikan sa kapritso. Ang kapritso bunga sa atong gusto nga mahitabo apan wala diay nato kinahanglana. Sama gud pananglit sa paghupot og nindot nga sakyanan bisan pa man kun ang tinud-anay natong gikinahanglan mao ang pagkaon. Kun maghisgot kita og panginahanglan nagpasabot kini og sumpay gyud sa atong kinabuhi ug sa kinabuhi sa uban. Sa laktod nga pagkasulti, diha sa atong paghimo og bisan unsang giisip natong mahinungdanon ang pangutana mao kun kini kinahanglanon ba gyud sa mga tawo usab nga nagpalibot kanato?

Dili lang kini mahitungod sa paghatag og mga hinabang material ngadto sa kadaghanan kondili mahitungod usab kini sa hustong programa ug sistema aron ang tanan mabulahan. Ang buot kong ipasabot mao nga daghang mga programa ug sistema nga gigambalay apan dili tanan nabulahan.

Hinunoa, ang nahimong nabulahan mao lamang ang pipila labina kanila nga nagpasiugda. Kun kini ang buhaton sa kadaghanan, pabilin nga usa ka dakong balighot ang kalambuan. Malisud ang pagkab-ot niini gumikan ning mosunod nga mga rason

1. Tungod kay wala man gihapon nahanaw ang kinaugalingon nga panlantaw.

2. Ang bisan unsang magkinaugalingon lamang ang nahimong babag sa paglambo.

Dili man gyud mahitabo ang gitawag natong classless society kay lisod man gyud  kining kab-oton tungod kay mosugot man kita o sa dili anaa man ang labeling kun kinsay anaa sa katilingban apan wala kini magpasabot nga halayo gikan kanato ang paghimo og maayo dili ba?

Nagpasabot kini nga higugmaon nato ang tawo ug gamiton nato ang salapi. Dili kay gamiton nato ang tawo unya higugmaon nato ang salapi. Busa ning panahon sa pandemiya ug krisis atong himoon kining mosunod:

1. Hunong. Bisan pa man diha sa personal nga kalamboan nga nasinati mas maayo nga mohunong ug mamalandong sa makadiyot ug liyokon og tan-aw ang palibot.

2. Dili lang kini mahitungod sa isyu nga ang tawo tapulan ug walay mahimo o dili ba kaha ang sistema wala mohatag sa maong kahigayonan. Ang makanunayong pagtabang apan ang pagtudlo sa gitabangan nga motabang pud ang gikinahanglan sa pagpahigmata ni bisan kinsa nga dinhi sa kalibotan dunay tugbang nga kaakuhan.

3. Ang pagsanong sa panginahanglan sa usag-usa usa naman ka mahinungdanong tabang aron mamahimong magaan gaanan ang pagabation sa mga hingtungdan. Alang sa gihatagan ang makasinati sa sense of belonging samtang ang mga nihatag ang makasinati usab sa sense of fulfillment kay bisan pa man sa dakong kalisdanan nahimong konektado ang matag usa for the better matud pa.