Ilogay

May bag-ong salida karon ang Ubos Balay Balauranan nga giulohan og “Ilogay.” Ang bida ug kontrabida ning maong salida mao sila si House Speaker Allan Peter Cayetano ug Marinduque Congressman Lord Allan Velasco. Kun kinsa ang magdala sa papel sa bida ug kontrabida kamo nay hukom.

Ang istorya sa salida nakabasi sa sabot-lalaki nga may numero nga 1521 tali sa duha niadtong pagsugod pa lamang sa ika-18 nga Kongreso. Ubos ning maong kasabotan maoy mouna og lingkod isip Speaker of the House si Taguig-Pateros Congressman Allan Peter Cayetano sulod sa 15 ka buwan ug mopuli kaniya si Marinduque Congressman Lord Allan Velasco sulod sa 21 ka buwan. Mao nga ang ilang kasabotan gitawag og 1521 nga personal nga gitambongan ug gisaksihan ni Presidente Rodrigo Roa Duterte.

Basi sa ilang sabot, nahuman na unta ang 15 ka buwan nga termino ni Cayetano niadtong Septyembre 30 ug mopuli na unta niya si Velasco apan wala kini madayon.

Aron mahilot ang nahimugsong kasungian, miadto ang duha sa Presidente ug nagkasabot nga sa Oktobre 14 na ang pag-ilis og liderato sa Ubos Balay Balauranan aron dili maapektohan ang pagpalabang sa 2021 nga nasudnong gahin o National Budget.

Apan niadtong miaging adlaw, gisuspenso ni Speaker Allan Peter Cayetano ang session sa Ubos Balay Balauranan human nila giaprobahan sa ikaduhang pagbasa ang 2021 nga gahin ug sa buwan na sa Nobyembre sila mamalik sa ilang session. Gawas sa pagsuspenso sa session, gitangtangan usab sa ilang committee chairmanship sa mga kaalyado ni Cayetano ang tulo ka mga dumadapig ni Kongresista Velasco.

Unsa kaha ang mahitabo pag-abot sa Oktobre 14? May kausaban gyud kaha sa liderato sa Ubos Bay Balauranan? Manghilabot kaha si Presidente Rodrigo Duterte? Ug kun manghilabot man, kinsa kaha sa duha niya ka mga dumadapig ang iyang paboran?

Atangi ang sunod nga panid sa salida nga atong giulohan og “Ilogay.”