Ang paggiya Pinasikad sa Lk. 6;39-42

Sa tanang butang nga  mahimong piyestahan mas dali ug sayon ang pagpiyesta sa sayop sa uban. Daghan ang at home niini ug daghan ang buot mohimo niini. Ngano man kaha? Aron pinaagi sa pagpunting sa kasaypanan sa uban mogawas ikaw nga maayo ug lamang sa tanang butang?

Bisan asa mahitabo kini, ma-poltika man o sa hawanang sagrado. Ang paghimo ba sa ingon nakatabang ba dako uyamot sa atong kaugalingong paglambo kun diha mismo sa atong pagpasiatab kita diay utro pud nga buluyagon?

Dako ug hamili ang tahas diha sa paggiya lalbina sa atong mga kabataan nga nagkinahanglan kaayo sa atong presensiya ug sa atong pag-amoma. Ang hunahuna sa usa ka bata daw sama sa usa ka tabula rasa kun hawan kaayo nga lamesa. Nagpasabot kini nga bisan unsa nga plato sa ideya mahimong atong ilatag sa maong hawan nga talad.

Sa laktod receptive kaayo ang bata. Ang iyang mga kaantigohan abktik ug paspas kun itandi kanato. Apan sa  laing bahin wala pa sa iyang hunahuna ang tukmang pag-analyze sa tanang mga hitabo sa palibot ni sa mga pulong nga iyang nadungog. Kun pagsugod pa lang daan ato na silang gitudloan og sayop nan, sayop na gyud ang tanan. Lisud na kaaayo kini pakgangon ug pitolon labina kun anaa na sila sa bahi nga panuigon. Samot na tingali kun ang atong kinabuhi mismo nahimong sukwahi sa gituohan nga maayo mao nga walay ngipon ang bisan unsang paningkamot sa paghapsay sa kinabuhi sa tawo kun kita mismo mibuot nga maglakat kita sa dalan sa kahiwian ug kawalay ayo.

Mao tingali tong akong Lola Delfina intawon. Kay lagi nagdako ko kuyog nilang Lolo Tinong, daw halang gyud ang baba kun mamalikas ako kay si Lola nako mohakgom gyud tog sili aron silian ang baba nga namalikas. Naa man gud to siyay kan-anan ug natural dunay mga tawo nga madunggan nako nga mamalikas mosunod lang pud ko abi nako og tisar ug cool ang trash talks. Apan si Lola kanunay nga nagbadlong kanako. Mao nga padayon gihapon nakong gihandum ang iyang presensiya bisan gani nga dako nako karon kay sa iyang yanong pagdala dala kanako sa bisan asang simbahan aron pugson ko og simba akong nakaplagan ang tinuod nga Giya nga way lain kondili ang Dios.

Sa akong bahin karong mga panahona, nga hamtong nako, nakita ko ang dili tiaw nga tahas sa paggiya sa ubang mga tawo. Ang makanunayong pagdasig kanila sa pagpuyo sa kinabuhi nga tarong ug husto lisod kaayo buhaton kun sa mga higayon nakita ko ang ang akong kaugalingon nga sama sa ubang mga tawo mahimong mahitumpawak sa kawalay kapaingnan.

Apan bisan pa niana padayon gihapon ako nga naningkamot nga mamahimong giya alang sa uban ug nagkinahanglan usab nga giyahan kanila nga nahimong hamtong diha sa kinabuhing Kristohanon.