Pagbanhaw sa prangkisa
Dayong kahuman sa kataposang sibya sa TV Patrol Central Visayas niadtong Biyernes sa hapon, nagsunudsunod ang text ug chat messages nga akong nadawat nga nangutana unsaon nila pagpirma sa petisyon nga moduso sa balaudnon paglab-as sa prangkisa sa ABS-CBN.
Pulos sila nasubo ug nahinugon sa pagkapawong na sa tulomanon sa adlaw mismo sa iyang ika-32 nga tuig sa pagsibya. Dungan nga nahunong ang tanang TV Patrol sa nagkalainlaing lalawigan gawas sa Metro Manila. Tungod ni sa pagpanira na sa tanang sibyaanan ubos sa payong sa ABS-CBN Regional ugmang adlawa, Agosto 31.
* * *
Among nahibaw-an gikan ni Leon Flores, usa sa convenors sa People’s Initiative for Reforms and Movement for Action (PIRMA Kapamilya), nga nagsugod na sila og pakigtagbo sa mga boluntaryo nga moduma sa pagpanghipos og mga pirma sa nagkalainlaing mga barangay sa Sugbo.
Ubos sa mga lagda sa People’s Initiative nga gitugotan sa 1987 Constitution, kinahanglang makakuha ang mga tigpasiugda og 3% sa rehistradong mga botante sa matag distrito ug 10% sa mga botante sa tibuok nasud una maduso ang petisyon sa nasudnong referendum nga dumalahon sa Commission on Elections (Comelec).
* * *
Masaligon si Flores nga bisan sa pandemya sa COVID-19, nga hinigpitan ang pagpanggawas sa mga molupyo gikan sa ilang kabalayan, makatigom ang PIRMA Kapamilya og pito ka milyon ka pirma sa tibuok nasud sa way paglapas sa mga lagda batok sa tinakdanay sa kagaw.
Nipasalig sab siya nga makakuha og duha ka milyon ka pirma sa mga dakbayan ug kalungsoran sa Sugbo tungod sa lapad nga suporta sa mga programa sa ABS-CBN.
* * *
Gitumbok ni Flores ang duha ka bentaha sa People’s Initiative: Malaktawan ang Kongreso kay direktang makapanday ang katawhan og balaod; ug kon maaprobahan sa referendum seguro nang mapatuman kay di mahimong i-veto ni Presidente Rodrigo Duterte.
Sa pasidaan sa kadagkoan sa Comelec nga mahimong maapiki sila sa kuwarta ug panahon sa pagsumiter sa petisyon ngadto sa mga botante, may andam nang sulbad ang PIRMA Kapamilya: Mahimong idungan ang referendum sa piniliayng lokal ug presidensiyal unya sa Mayo 2022, aron matubag ang kakuwang sa kuwarta ug mahatagan ang mga tigpasiugda ug ang Comelec og duha ka tuig nga lugway.
* * *
- Latest
