Krus

AGOSTO 30, 2020: Ikakawhaag-duha nga Domingo sulod sa tuig

Mga Pagbasa: Jer. 20;7-9/

Sal. 63/Rom. 12;1-2/Mt. 16;21-27

Ang krus alang sa tawhanong pagsabot mao man ang timaan o timailhan sa atong kapildihan ug kaulawan. Usa ka dakong pagkapukan ang mahilansang sa krus. Apan alang kanatong mga Kristohanon ang krus simbolo man sa kang Kristong pagdaug. Dunay kapilya sa among parokya ni San Jose dinhi sa Madridejos, Alegria nga dunay krusipiho kang kansang tiilan dunay ulo sa kalabera sa tawo. Sa akong yanong pagsabot ang maong hulagway nipahinumdom sa kang Kristong pagdaug batok sa kamatayon. Ang krus diay dili kapildihan kondili kadaugan ingon man taytayan alang sa  atong tagsatagsa ug linangkob nga kaluwasan.

Sa laing bahin, ang krus dunay gipataban nga responsibilidad sa pagpas-an niini adlaw-adlaw sa atong kinabuhi.

Segun sa atong nadawat nga tawag ug tahas kita mosakripisyo gyud ingon sa angay. Ning paagiha atong gisabot ang krus ingon nga responsibilidad.

Dugang pa ang krus mao man ang tambal sa atong pagkamapatuyanong sa tanang butang. Ning paagiha sabton nato ang krus ingon nga sakripisyo ug pagbuntog sa atong tawhanong kahilig nga kun dili nato mapakgang nan, magdala kini nato sa atong kalaglagan. Kay dili tanang sayon ug lami makabuhi ang uban kanila makamatay.

Ang gibug-aton sa krus wala man mag-agad sa krus mismo kondili sa matang sa kinaiya nga atong gipakita sa matag higayon nga kita mopas-an sa atong krus. Kun ato kining dad-on sa mug-ot nga disposisyon kini mamahimong bug-at gyud alang kanato.

Apan kun dad-on nato kini uban ang kalipay ug kalinaw, nan, mamahimo kining gaan ug dali alang kanato. Kay kuyog man gyud nato ang Dios nga mopas-an niini. Hinumdomi nga hawa kaniya, wala kitay mahimo. (Jn. 15;5).

Ning panahon sa pandemiya unta kita mahigmata sa buhing matuod nga taliwala sa atong kalisdanan karon anaa ang Dios ug wala siya matulog ni nanghinanan-aw lamang.