EDITORYAL - Martial law sa Sulu?

Ang pagpamombang nahitabo sa Jolo, Sulu niadtong nakalabay nga adlaw’ng Lunes nagpakita nga bisan sa estriktong mga checkpoints nga gipamutang sa mga otoridad tungod sa pagpatuman sa health protocols bunga niining pandemiya sa COVID-19, malutsan gihapon kini sa mga desididong magmugna og kasamok.

Tungod niini, adunay sugyot ang usa ka labaw sa Philippine Army nga mas maayong ipaubos og balik ang Sulu sa martial law sa tinguhang mapadali ang pagpangita sa mga responsible sa maong pagpangatake niadtong Lunes.

Ang duha ka pagpamomba nga niresulta sa kamatayon sa 15 ka tawo ug nakaangol og gibanabanang 78 ka tawo, sundalo, polis ug mga sibilyan,  gipasangil sa militar ug sa kapolisan nga binuhatan sa Abu Sayyaf Gang. Daan ng naghigwaos ang mga taga Jolo aning kagubot nga binuhatan sa mga Abu Sayyaf sugod pa niadtong dekada 90. Niadtong  miaging tuig gibombahan sab ang simbahan Basilan nga nikalas sab og 20 ka tawo.

Pipila palang sab ka bulan sa dihang gilibkas na ang martial law tibuok sa Mindanao human sa pagatake sa Abu Sayyaf ug ISIS-inspired Maute terror group didto sa Marawi City. Apil ang Sulu sa gipaubos sa martial law. Karong pagsulod ning tuiga, nanga- lockdown sab ang mga tawo mas labaw pa sa martial law tungod aning pandemiya sugod pa niadtong Marso hangtud karon.

Si Army chief, Lieutenant General Cirilito Sobejana miingon nga kun ibalik ang martial law sa Sulu, dako kini og matabang sa gobiyerno pagpangita sa mga sakop sa Abu Sayyaf ilabi na ang ilang network. Ang ASG giingong naglihok sa mga hilit nga bahin sa Sulu ug sa mga isla niini, apan may pagduda nga duna silay mga gaway diha sa Jolo ug Basilan nga diin daghang mga tawo ug sentro sa komersiyo.

Niadtong gipaubos ang Mindanao sa martial law sud sa duha ug tunga ka tuig nimenus ang mga pagpangatake sa ASG ug uban pang mga Islamists samtang nikusog sab ang komersyo sa isla.

Apan kinahanglan nga sa pagpatuman og martial law, kinahanglang siguraduhon nga kadto gyung nalambigit mao ray mahasol ug dili ang mga sibilyan nga nagsubay sa balaod.