Pangaliya ug pagsalig
Kay kutob na man lang Biyernes ang among mga sibya ug hingpit na mang tak-opan ang ABS-CBN Cebu sa kataposan ning buwana, nanghipos ug nanghakot nang kapin sa gatos ka kawani sa personal nilang mga butang.
Tungod sa hulga sa COVID-19, di mi magkadungan sa pag-adto sa sibyaanan (kay kasagaran nagtrabaho man gikan sa pinuy-anan) aron nga di magkatapok ug di mameligrong magtinakdanay.
Maong bisan may pipila namo nga magkaabot, gipahinumdoman ming di maghangpanay ni magduol. Gitugotan ko sa among kadagkoan nga manghakot sa akong mga butang niadtong Biyernes.
* * *
Bisan matag adlaw pa kong moadto sa ABS-CBN Broadcast Complex alang sa TV Patrol Central Visayas, gitugotan ko sa management nga di mosud sa studio aron di mapaubos sa higpit nga mga lagda. Maong sa gawas ko sa building magbalita.
Gitambagan ko nga, aron di malangay ni maapektahan, ibutang dayon sa sudlanan ang tanang nakong butang sa way paghunahuna sa nahilambigit nga mga handumanan ug kasinatian. Apan napakyas ko pagtuman sa pahimatngon. Nalumos ko sa nagbaha nga mga sugilanon sa matag gamayng pahinumdom sa niaging duha ug tunga ka dekada.
* * *
Nitanyag pagtabang og panghipos ang mga kawani nga gipasud sa building aron pagtiwas sa nahibiling kaliboan ka gimbuhaton.
Nibalibad ko kay mas dinalian ang ilang mga tahas. Igo na lang nagkomedyahay sa among mga plano kay sa tapos sa buwan managsamang wa nay trabaho.
Napuno ang gibitbit nakong duha ka sudlanan ug kinahanglan nang mobiya.
Sa wa pa mogawas, gilapas nakong lagda og nilili ko sa announcer’s booth sa DYAB ug sa TV newsroom kay mahimong wa nay laing kahigayonan.
* * *
Bisan sa kabug-at sa akong gibati, ambot nganong gaan ang mga lakang nga nigawas sa broadcast complex sa Jagobiao, Mandaue City. Tingali tungod sa kaamgohan nga sa kataposan nahatagan na og kinutoban ang pila ka buwan nga kalibog unsay among dangatan.
O tingali tungod kay sa kinauyokan nga bahin sa among kasingkasing padayon ming nangaliya ug nisalig nga nag-atubang lang mi og taas ug ngiob nga kagabhion ug nga mosiak ang banagbanag ug makaabot pa mi sa adlaw nga ang ABS-CBN Cebu, sama sa nahitabo 32 ka tuig ug usa ka buwan ang nilabay, makatingog pag-usab.
* * *
- Latest
