Langit ra’y nasayod’’

Mitiyabaw ang operations head sa usa ka pribado’ng ambulance service company sa giingon niini nga malisyoso’ng pagsibya sa Facebook mahitungod sa naghinobra kuno niini nga bayad sa ilang serbisyo ngadto sa usa ka pasyente. Mipakita ang nag-akusar sa resibo sa iyang nabayran. Tataw nga ang matag habig adunay kahimangod sa usag’usa.  Tungod kini sa panultihon nga: “Nasuko sila kay ang kamatuoran nga imong gipamulong misukwahi man sa bakak nga ilang gipuy-an”.  Kon kinsa ang namakak, langit ra ang nasayod.  Hala no!

Bubuka, Sisira Ang Bulaklak

Ubos sa lagda sa GCQ/MGCQ, gitugtan na sa DTI ang mga patigayon nga kan-anan nga modawat og customer hangtud 50% sa ilang kapasidad.  Apan kon magkabanay ang mangaon, kinahanglan nga mopakita sila’g pruweba nga sila nagpuyo sa usa lamang ka address o puloy-anan.  Naglisod man gani pag-agni ang mga kan-anan og customer, hiktinan pa gyud ang pagpasulod kanila.  Matud pa sa akong silingan, “Kon ablihan, ablihan gyud..dili kay mag-anda-anda. Mora ma’g kanta sa mga bata nga “bubuka ang bulaklak; sisira ang bulaklak”.  Pagkatuytoy!

Panig-ingnan sa aso ug kalayo

Gimandoan ni Presidente Duterte si USec Melchor sa paghimo’g imbestigasyon sa PhilHeallth tungod sa pasangil sa halapad nga anomaliya sa maong ahensya. Naaghat ang imbestigasyon human mopabuhagay sa iyang pasangil ang abogado sa PhilHealth nga si Atty. Thorrsson Montes Keith.  Hinaut nga dili unta tinuod ang obserbasyon sa uban nga dili pa maundang ang COVID samtang aduna pa’y gahin nga kwarta ang gobyerno.  Apan ginaingon nga “Wala’y aso nga makumkom” ug “Kon naa’y aso, naa pu’y kayo”.  Na hala, utingkay na dis!

‘Hari sa kalsada’

Mihatag na sa ilang pagtugot ang Department of Transportation sa pag-abli sa mokabat 14 ka mga rota nga mahimong mabiyahe-an sa mga PUJ nga gibana-bana nga mosugod na sunod semana.  Ni’ng maong kalambuan, nga gipanghingusgan gayod ni Gob. Gwen Garcia, maoy mopahibalik sa dugay na nga nawala nga sakyanan nga gibansagan nga “hari sa kalsada”.  Makatuaw gayod  niini sa kalipay ang mga drayber ug operator sa pag-ingon: “Malipayong pagbalik Mahal nga Hari”.  Saoonz!

Ang sayop, sayop gayud

Matud ni City Attorney Rey Gealon mahimong manubag sa kaso nga “dishonesty ug misconduct” ang Barangay Kapitan sa Cogon-Ramos human miangkon sa iyang sayop paghatag honorarium sa tanod bisan kon nagtingkagol kini sa prisohan.  Midason ang Kapitan nga gibuhat niya kini tungod sa “humanitarian reason”.  Ang sayop, sayop man gyud bisan kon kinsa ang nagbuhat o kon unsa pa ang hinungdan.  Apan husto si Thomas Jefferson sa iyang giingon nga, “Taas nga panahon ang gikinahanglan pag-agni sa tawo pagbuhat bisan gani niadtong makaayo unta kaniya”.  Fezteleern!