Maluwas unta ang prangkisa

Duna ba untay nahimong ABS-CBN Corporation aron malab-as ang iyang prangkisa ug di mapugos pagpanangtang sa kaliboan ka kawani?

Nagbaha nang sugyot sa mga politiko unsay angayng gihimo sa kompaniya aron pagluwas sa ilang negosyo ug sa panginabuhi sa mga kawani.

Niingon si Kongresista Rodante Marcoleta nga naaprobahan untang prangkisa kon nagpaubos pang mga tagduma atol sa 13 ka public hearings sa House of Representatives.

Makatabang ba kon niluhod silang ABS-CBN President Carlo Katigbak ug kaubanan atubangan sa mga kongresista ug ni-amen nilang tanan ug nitila sa ilang mga lapalapa?

* * *

Niingon si Kongresista Mike Defensor nga naluwas unta ang kompaniya kon si Eugenio “Gabby” Lopez III ni-renounce pa sa iyang American citizenship o nisalikway sa pagka-tsirman sa ABS-CBN.

Makatabang ba kon gawas nga nagdumili sa pagpuli sa iyang amahan nga si Eugenio “Geny” Lopez Jr. gisukwahi sab ni Gabby ang mga mithi sa kompaniya sa pagserbisyo sa Pilipino bisan asa siya sa kalibotan ug bisan unsay iyang panginahanglan, di lang atol sa mga katalagman kon dili sa pagpanalipod sab sa katawhan gikan sa panaugdaog sa mga nagtungkawo sa gahom?

* * *

Niingon silang Presidente Rodrigo Duterte ug ang iyang mga alyado sa Kongreso nga ang labing maayong mahimo sa Pamilyang Lopez aron nga malab-as ang prangkisa mao ang pagbaligya sa ABS-CBN.

Makatabang ba kon gikalimtan sa mga Lopez ang makasaysayanon nilang pagdaog batok sa diktadura ni Ferdinand Marcos ug nakigsabot dayon sa mga negosyante nga labing suod sa presidente nga iyang gikumpisal sa Sulu nga ganahan niyang maoy mabuhong atol sa iyang pamunoan?

* * *

Kon gihimo pa sa ABS-CBN ang mga sugyot sa ibabaw mahimong nakahupot nang kompaniya karon og lab-as nga prangkisa alang sa laing 25 ka tuig, inay nga mangandam sa mga pabawon sa kaliboan ka kawani nga tangtangon human sa Agosto 31.

Apan unsay kapuslanan sa prangkisa kon nisugot pang mga tagduma sa ABS-CBN nga mahimong laing turutot sa gobyerno ug kakonsabo sa mga negosyanteng nitumpi sa higanteng ginansiya di tungod sa paningkamot kon dili sa pagpahimus sa tanang pabor gikan sa Malakanyang?

Unsay kaayuhan sa pagpabilin sa ABS-CBN sa kahanginan kon mawad-an sa kaligdong ug busa di na takos sa pagsalig sa katawhan?

* * *

[email protected]