Diha sa kahilom

Dunay mga higayon nga ako ilang akusahan nga walay paki sa akong isig ka ingon tungod kay late kaayo ang akong reaction labina kun maghisgot kita og emosyon. Kini tungod kay naanad man gud ko nga ako unang hunahunaon ug i-analyze ang sitwasyon. Anugon man pud kaayo nga mohimo ako og kisaw apan ang maong kisaw walay hinungdan.

 Mao nga mas palabihon ko pa ang paghilom kaysa pagtingog. Dugang pa, mas makaayo nga dili sila masayod sa akong gihunahuna ug mga laraw. Kay after all ako mao ako ug sila mao sila mao nga dili maayong ipamugos nato ang bisan unsa nga giisip natong mahinungdanon apan dakong usik alang nila.

Ang paghimo mahimong imantala dili tungod kay nag-apas ta og pasidungog kondili kinahanglanon kini usahay aron sa ingon kini makadasig usab sa uban nga mohimo og  maayo. Nahinumdom nuon ko ni Francis Leo Marcos. Ang iyang mayaman challenge nakapadasig sa ubang dunay mahimo nga mopaambit pud sa ilang bahandi sa pagtabang sa kadaghanan.

Hinuon luyo sa maong kadasig anaa ang kadulom sanglit dunay mga tawo nga nigukod kang Francis Leo gumikan ning iyang gipakita. Hinuon dili ko makahukom sa iyang pagkatawo apan tingali duna pud siyay sayop.

Mahimong makaalagad kita karon sa atong kaigsuonan diha sa atong paghimo og maayo bisan walay media coverage. Bisan gani ang yano apan kinasingkasing pahiyom dako naman kaayo og kahimoan aron mamahimong malipay ang imong isigkaingon nga nahimong nalumsan sa tumang kasakit ug kamingaw gumikan ning COVID-19.

Apan daghan nato ang dili buot og kahilom. Ngano? Kini tungod kay ang kahilom man gud maoy makapatukbil sa atong gipangdala dala nga isyu sa kinabuhi ug daghan nato ang naglikay nila sa kapasikaran nga dili kita buot masakitan.

Daghan nato ang dili buot og kahilom sanglit ang kahilom mao may magdala kanato ngadto sa langob sa hilabihang pagpamalandong aron pagpangita sa kamatuoran. Ug ang kamatuoran nga usahay atong maamgohan nga sakit ug halang.

Apan bisan pa man niini dawaton gihapon nato ang sakit sa maong kamatuoran kay ang maong kamatuoran magdala man gihapon kanato sa atong kagawasan.