Si Tomas

Sa dihang gisaulog nato ang pangilin ni Santo Tomas ang giisip nga madudahon, akong nakita ang bili sa pagduda. Tinuod adunay pagtuo apan sa laing bahin dili pud maayo o makaayo nga ato na lang kalimtan sa hingpit ang atong kahigayonan nga mangutana.

Kini tungod kay mahinungdanon kaayo ang pagpangutana dili tungod kay ganahan ka lang mangutana kondili tungod kay ang pagpangutana bililhon ni bisan kinsa nga dunay hustong panghunahuna. Kini tungod kay diha sa pagpangutana buot lamang natong tukbilon ang tanang mga pamaagi makab-ot lamang ang atong gipangita nga tubag.

Si Tomas ang nahimong biktima sa bias nga madudahon. Gani sa dihang napatik sa ebanghelyo nga ang atong Ginoo nagkanayon: “Bulahan kadtong mituo bisan wala makakita” tuo ug ayaw na pagduha duha kini tungod kay ang isyu naghisgot man kalabut sa tinguha ni Tomas nga mahikap ang mga samad ni Jesus. Ug sa dihang kini nahikap ni Tomas siya nagkanayon uban ang dakong pagtuo: “Ginoo ko ug Dios ko!” sama ni Maria sa dihang nangutana siya: “Unsaon man pagkahimo niini nga ulay man ako?” ug sa dihang gipasabot siya ni Arkanghel Gabriel nga ang gahum sa Espiritu Santo mokunsad kaniya, nan, nahimong mas nagmanggihatagon si Maria ngadto sa kabubut-ong Diosnon sa dihang miingon siya: “Matuman dinhi kanako ang imong Gisulti!” human makasabot siya mibuot nga motahan sa iyang kaugalingon ngadto sa  Dios.

Sa atong kinabuhi, dili maayo nga mamahimong submissive lang gyud kaayo sa mga hitabo. Kinahanglang mangutana kita dili tungod kay buot lang natong tition ang tanang mga tubag kondli buot natong sabton aron diha sa maong pagsabot kita mahigugma sa atong gisabot.

Niadtong kolehiyo pa ko giingnan mi sa among maestro nga sa among pagtuon sa pilosopiya gamiton namo ang among utok ug kun sa teolohiya  gamiton usab namo ang among mga tuhod diha sa pagpiko niini sa pag-ampo. Mao tingali nga dunay mga panahon nga daw sa walay kadasig ang magbasa lamang sa mga libro, kini tungod kay nakaamgo ako nga nindot gyud diay kun anaa ka sa presensiya sa Ginoo.