Nagkaguliyang sa passes pa lang
Nipasalig si Cebu City Mayor Edgar Labella nga dugangan ang bag-ong quarantine pass kon mapamatud-ang kuwang ang napatik nga 178,000 ka pases.
Kon ang kasibaw sa reklamo sa mga molupyo nga wa kadawat sa passes ang basehan, di na kinahanglang molusad si Labella og laing imbestigasyon pagmatuod nga wa matuman ang iyang pasalig nga maaporan ang matag panimay.
Apan kalikayan unta ang kaguliyang kon gibarugan pa lang ni Labella ang iyang pagkamayor inay nga moyangu-yango sa mga nidiktar niya. Ug kon nakat-on pa lang unta sa nangagi niyang kasaypanan.
* * *
Kon may kaisog pa lang unta si Labella sa pagpasabot ni Kalihim Eduardo Año sa Department of Interior and Local Government (DILG) nga di makiangayon ang kalit nga pagkanselar sa karaang pases dayong tungang gabii sa niaging Martes, Hunyo 23, kay wa pa maandam ang bag-ong pases, wa unta mahasol ang mga molupyo.
Wa hinuon katabang ang tulo ka adlaw nga kalangay sa pagtarung sa bag-ong pases. Gawas nga wa diay kapuslanan ang QR code, karon gidasig nang mga molupyo sa pagpasa-pasa ug busa mahimong makapasamot na hinuon sa tinakdanay.
* * *
Ang kakuwang sa bag-ong passes gibasol ni Labella sa ilang gitamdan nga listahan sa Department of Health (DOH). Nga napamatud-an na niyang sayop niadto pang Mayo kay ang samang listahan maoy nakalawgaw sa rapid mass testing niadtong Mayo—naapil ang mga nangamatay ug mga namalhin sa laing mga barangay.
Hinaut nga may makapahinumdom ni Labella sa tambag sa bantogang si Albert Einstein nga ang pagbalikbalik sa samang sayop uban ang panghinaut sa lahi nga resulta usa ka pagpakabuang.
* * *
Kasaligang tinubdan sa City Hall nagbutyag nga nahulbot ni Labella ang listahan sa DOH dihang kalit nga gipangitaan sa kapolisan og opisyal nga ihap sa households.
Bahala nga napaso na siya sa samang listahan, mas mahinungdanon alang niya ang pagmatuod sa bag-ong mga hawod nga nibutho sa Sugbo nga ang dakbayan maoy labing andam sa pandemiya.
Kon wa magkadimao bisan sa quarantine passes di ikahibung nga mas nagkaguliyang ang mas komplikado nga pagpatuman sa kampanya sa pagbadlong sa paspas ug lapad nga pagsulbong sa mga kaso sa COVID-19 sa kinabag-an sa 80 ka barangay.
* * *
- Latest
