EDITORYAL - Kinahanglang suwayan

Way usa o duha ka mga estratehiyang maingon ta epektibo batok sa pagkuyanap sa novel coronavirus disease (COVID-19), mao kini ang pamahayag ni DOH Secretary Francisco Duque III atol sa unang pagpakighinabi pinaagi sa virtual presser sa mga sakop sa IATF sa mga sakop sa lokal nga media sa Cebu sayo ning semanaha. Apan tungod kay daw buslot sa tangke sa tubig nga nagawas-awas ang gidaghanon sa mga natakboyan ug nameligro na ang kapasidad sa healthcare system sa Sugbo, kinahanglang pangitaon kun asa ang buslot niini aron mahunong.

Matud ni Duque, ang COVID-19 usa ka pandemiya nga dili lang ang Pilipinas maoy nagsagubang. Ang nagkadaiyang gobiyerno sa mga kanasuran adunay kaugalingong mga estratehiyang gigamit batok sa sakit pinaagi sa kung unsay maabot sa ilang kapasidad.

Ug tungod kay pandemiya man ug way makapangangkong ang ilaha maoy epektibong pamaagi, ang bugtong mabuhat nalang mao ang pagsuway og gamit sa dunay labing maayo og resulta.

Mao kini ang gipasabot ni Duque sa iyang pamahayag, ang mga nasud nagbinayloay og mga impormasyon kun giunsa nila pagsagubang ang problema ug suwayan kini sa paggamit.

Apan kay pandemiya man, mahimong ang pamaagi sa uban nga epektibo didto sa ilahang lugar dili pwedeng gamiton dinhi. Posibleng ang gihimo didto sa Metro Manila nga nakaingon sa pagpahinay sa pagtakod sa virus dili mosalir dinhi sa Sugbo, apan dili kini mahibaw-an kung dili suwayan.

Ang bugtong pamaagi nga dili na unta kinahanglang ipaagi sa pwersa ang pagtuman mao ang disiplina sa mga tawo sa pagtuman sa basic health protocols.

Kini ang social distancing, stay home, pagsuot og facemask ug batasanon ang pagpanghugas ug pagpanabon sa mga kamot. Dako kaayo og papel ang katilingban sa kalamposan batok sa COVID-19.

Bisan gani ang mga lider sa nagkadaiyang kanasuran sa kalibotan ilabi na ang United Nations ug ang World Health Organization namahayag nga dili magmadaugon ang mga nasud batok sa COVID-19 kun magiyahay lang og diskarte. Dinhi sa Sugbo, kinahanglang magkahiusa ang mga Sugboanon sa usa ka tumong, ang pagpahunong sa pagkatap sa virus sa kabarangayan.