Pagsusi unsa katinuod ang trahedya
Kon ganahan si Heneral Roy Cimatu nga mahibawo asa magsugod sa pagsulbad sa nagsulbong nga mga kaso sa COVID-19 sa Dakbayan sa Sugbo, mangahas mi og sugyot nga iyang subayon ang sugilanon sa usa ka anak nga ni-detalye sa social media giunsa nila pagpakitabang sa barangay, sa Department of Health (DOH) ug ubang mga buhatan sa gobyerno ug pribado ug publikong mga tambalanan aron lang maluwas ang ilang inahan.
Makapatandog sa balatian ang pagtagsa-tagsa niya sa mga higayon nga gibalibaran sila hangtod nga namatay ang inahan ug natakdan silang mga anak.
* * *
Gitago sa nagsuwat ang tinuod niyang ngan apan ginganlan ang ilang barangay, ang pribadong tambalanan nga namatyan sa iyang inahan ug ang mga kawani sa barangay nga nipasa-pasa nila ug gitino ang mga petsa sa duha ka semana nilang kalbaryo.
Kay gitugyanan man siyang Presidente Rodrigo Duterte sa tanang gahom ug gitugotan nga makagamit sa tanang kahimanan sa gobyerno, apil nang pagpalihok sa kapolisan ug kasundalohan, mahimong tultulon ni Cimatu ang tagsuwat, mapakighinabian, masusi unsa katinuod ang seryuso nga mga pasangil ug, labaw sa tanan, mahatagan og tabang.
* * *
Wa koy paagi pagsusi sa kinatibuk-ang panghitabo maong di kong kahingan sa nahisgutang mga ngan. Apan labihan kapuno sa mga detalye nga mahimong tinuod ang pait nga kasinatian o maayong motahi-tahi og istorya ang tinubdan sa kasayuran.
Makatabang ang kaabunda sa kasayoran sa mga opisyal nga sama kagamhanan ni Cimatu sa pagsubay unsa kaandam ang mga barangay, unsa kapuno ang mga tambalanan ug unsa kahapsay ang mga lagda sa pag-atiman sa mga molupyong may mga timaan sa COVIDi-19.
* * *
Kon tinuod ang sugilanon sa anak nga namatyan, hingpit nga masabtan nganong paspas ang pagsulbong ug pagkatap sa COVID-19 sa kabaranggayan. Di tungod sa kabadlongon sa katawhan, sukwahi sa pasangil sa presidente, kon dili tungod sa kapakyas sa mga tagduma sa tinuod nga pagpangandam batok sa pandemiya.
Kon tinuod ang trahedya sa makaluluoy nga pamilya, mapamatud-an nga ang lokal nga mga opisyal maoy gilawogan og sayop nga kasayuran, sukwahi sa ilang pasangil batok sa Inter-Agency Task Force (IATF), o sila maoy nagpa-goryo-goryo kay nabiktima sa ilang kaugalingong pasalig nga ang Cebu City maoy labing andam.
* * *
- Latest
