Bug-at para sa gahi

Gipriso sulod sa 12 ka oras ang mga tawo nga nasakpang naglaag nga walay quarantine pass ug facemask. Sulod sa 12 ka oras ang maong mga tawo gipaampo, gipa-exercise ug gipa-seminar.

Mao ni ang silot nga gipahamtang sa dakbayan sa Sugbo sa mga nakalapas sa health protocols nga gipatuman tungod kay gipaubos na usab kini sa enhanced coomiQuarantine o ECQ.

Dili haum kining maong silot. Gaan ra kaayo kini alang sa mga gahi og ulo ug masinupakon sa gipakanaug nga health protocols. Ang haum nga silot mao ang pagpahamtang og bug-at nga silot niadtong mga gahi og ulo. Tinuod nga ang pag sul-ob og facemask, pagdala og quarantine pass ug ang pagtamod sa social distancing simple ra kaayo nga health protocols mao nga wala manginahanglan og bug-at nga silot.

Apan mas maayong dili ibasi sa gigamyon sa buhat o gibuhat ang silot kondili sa pagka masinupakon sa tawo nga nagbuhat. Buot ipasabot nga ang silot ibasi dili sa binuhatan o buhat sa tawo kun dili sa iyang pagka gahi og ulo o pagka masinupakon sa balaud.

Sa akong nakita daghan ang misupak sa gipatuman nga health protocols tungod kay wala man siloti ang mga nakalapas niini.

Ang pag-ampo, pag-exercise ug pag-seminar sulod sa 12 ka oras dili man kini silot kun imong palawman ang imong pagsabot. Silot ba god nang paampoon ka, pa exercison ka ug seminaron?

Dili ba ang pag-ampo magpaduol man nimo sa Ginoo? Dili ba ang pag exercise makapalagsik man kini sa panglawas? Dili ba ang seminar makadugang man sa kahibawo sa tawo? Busa, asa man niini ang silot?

Ako nabalaka nga mas modaghan pa og samot ang mosupak sa health protocols dinhi sa dakbayan sa Sugbo tungod kay gipaboran man ang mga masinupakon.

Sugyot nako ang bug-at nga silot para sa mga gahi og ulo.