Gustong himuong co-maker sa loan

Dear Atty. Divine,

Ang akong igsuon gustong mo loan sa bangko ug himoon ko niyang co-maker. Akong gisultian ang akong wife ug mipahimangno siya nako nga kun dili makabayad ang akong igsuon sa maong loan hayan ako maoy paninglan sa bangko. Ang akong pangutana kun husto ba ang akong asawa nga akoy paninglan sa bangko kun mapakyas pagbayad sa loan ang akong igsuon? Daghang salamat. —JV

Dear JV,

Basi sa balaod, ang co-maker liable gyud sa loan. Ubos sa Article 1207 sa atong Civil Code  kini nagkanayon nga  kun dunay two or more debtors, ang ilang tulubagon magdepende sa unsay nalatid sa Contract of Loan nga ilang gipirmahan. Buot ipasabot nga kun nalatid sa contract nga ikaw  isip co-maker, jointly and solidarily liable  uban sa imong igsuon nga maoy principal  debtor then apil gyud ka  nga paninglan sa bangko sa tibuok loan kun mapakyas siya sa pagbayad. Apan  kun wa malatid sa contract nga jointly og solidarily liable ka, then  pwede ka paninglan sa bangko sa katunga lang sa amount sa loan kun di kini mabayran sa imong igsuon. Busa sa dili pa ka modesisyon sa hangyo sa imong igsuon, mas maayo nga imong hunahunaon daan ang imo unyang tulubagon  isip co-maker kun di mabayran ang maong utang. Thanks and God bless. —Atty. Divine

* * *

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.