Gigamit ang supply sa kompaniya

Dear Atty. Divine,

Nagtrabaho ko sa usa ka kompaniya isip janitor. Duna mi mga supply sa mga  tissue , sabon, alcohol ug uban pa,  para ibutang namo sa mga comfort room human namo og limpyo. Apan nabantayan nako akong usa ka kauban nga iyang gisud sa iyang bag ang ubang supplies.

Sa dihang akong gisita, iya ra daw pulihan kun makapalit na siya kay nahutdan daw siya og tissue ug alcohol. Ang akong pangutana  kun  pananglit mahibaw an siya sa among employer  nga iyang gigamit ang supplies for  personal use pwede ba ni kabasihan aron siya mataktak sa trabaho? Daghang salamat.

John

* * *

Dear John,

Ang pagkuha sa butang nga gipanag-iya sa kompaniya nga way pagtugot niini, mamahimong kabasihan sa  pag-terminate sa empliyado.

Kamo isip mga trabahante, gisaligan mo sa inyong employer  sa mga supplies nga inyong gamiton sa pagpanglimpyo apan kun inyo kining gi misappropriate  or gikawat natural lang nga adunay tulubagon ang empliyado ilabi na kun makadaghan na kini niya buhata.Hinuon, ang employer kinahanglan nga mohatag una og due process sa empliyado una kini niya taktakon kun ugaling mapamatud an nga sad-an.

Busa mas maayo nga imong badlungod ang imong kauban sa dili na paggamit sa inyong supplies alang sa personal use bisan kun gamay ra kini nga butang  aron  di siya mamiligro nga mapalagpot sa trabaho tungod sa maong kalapasan. Thanks and God bless.

Atty. Divine

* * *

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.