Kita ta usab ang mabasol

Nagtuo ko nga ipadayon sa nasyonal nga kagamhanan ang status sa dakbayan sa Sugbo ilalum sa general community quarantine (GCQ) sa announcement sa bag-ong status sa coronavirus disease sa mga lugar tibuok nasud.

Apan mas mibalik hinuon ang kahimtang sa siyudad ngadto enhanced community quarantine (ECQ). Kini tungod sa nagsaka nga mga kaso sa COVID-19 sa kabaranggayan nga ang dakbayan na gani ang giingong epicenter sa maong sakit sa nasud.

Ang pagdulhog sa siyudad sa Sugbo balik ngadto sa ECQ gibasi usab sa rekomendasyon sa Inter-Agency Task Force for the Management of Emerging Infectious Disease (IATFMEID) human sa mga pakisusi niini.

Kini gumikan usab sa grabe nga pagsulbong sa gidaghanon sa mga nataptan sa maong sakit nga giingong nagdasok na sa mga hospital ug sa mga eskwelahan nga gihimong mga barangay isolation center aron pag-accommodate sa mga pasyente.

Hinuon wala ko matingala sa desisyon sa national government sa pagbalik sa status sa dakbayan.

Klaro kaayo nga migrabe na ang sitwasyon ug angay lamang nga mas higpit pa ang pagpakigbatok sa maong balatian.

Walay lain nga mabasol niining grabe nga pagsaka sa mga kaso sa COVID-19 sa atong lugar kondili kita ra mismo nga mga lumulopyo, kinsa kadaghanan pulos mibalewala lamang sa lagda nga gipatuman sa lokal nga pangagamhanan.

Gani, didto sa downtown area, ilabina na sa dalang Colon, atong makita ang nagkadaghan nga mga tawo nga nagpunsisok sa mga establisimento. Kadaghanan nila ang mibaliwala lamang sa lagda sa social distancing.

Kining pagkagahi sa ulo sa uban nga mibaliwala lamang sa lagda sa quarantine resulta sa seryosong pagsaka sa mga kaso sa coronavirus disease sa dakbayan. Ug dili nato mabasol ang task force sa rekomendasyon niini pagbalik sa siyudad sa ECQ.

Hinuon, wala gayud magkulang ang atong lokal nga pangagamhanan, Department of Health ug ubang hingtungdan nga ahensiya sa gobiyerno pagpahimangno sa katawhan sa pagmatngon batok sa maong makamatay nga balatian.

Karon mibalik na usab kita sa ECQ human sa duha ka semana nga GCQ. Hinuon, sa laing basin, magsilbi usab kini nga leksiyon alang kanato.

Nga ang higpit nga pagtuman sa lagda mao lamang atong dag-anan batok sa maong balatian.