Paghungaw sa lang-og nga tinagoan
Tungod sa kamatayon ni Barangay Kapitan Litang Abarquez sa Pardo, Cebu City napamatud-an ang laksot nga kamatuoran nga hagbay rang gidudahan sa nagkalainlaing sektor apan gipanghimakak sa hingtungdang mga opisyal sa gobyerno:
Dungan sa pagsulbong sa mga kaso sa COVID-19 nisaka sab ang gidaghanon sa mga pasyente nga grabe ang kahimtang;
Napuno na ang mga tambalanan sa Sugbo, nagkuwang na gani ang ICU beds ug ventilators bisan alang sa mga pasyente nga sama ni Abarquez wa pa matino nataptan bag COVID-19; ug
Padayong natanggong ang swab samples sa mga laboratoryo.
* * *
Ang pagdaghan sa grabeng mga pasyente ug kakuwang sa mga higdaanan sa mga tambalanan alang nila gibutyag na pinaagi sa social media sa inilang mga mananambal sa Sugbo. Apan gisalikway gilayon sa lokal nga mga opisyal sa Department of Health (DOH) ug sa ubang buhatan sa gobyerno.
Napamatud-an ang kasayuran atol sa pagduaw sa Sugbo sa niaging semana sa kadagkoan sa Inter-Agency Task Force (IATF). Gitug-anan sila sa mga tagduma sa pribado ug publikong mga tambalanan nga nagkuwang nang ilang ICU beds, hospital beds, isolation wards ug mechanical ventilators.
* * *
Nakugang silang Kalihim Carlito Galvez ug ubang kadagkoan sa IATF dihang niinsistir si Regional Director Jaime Bernadas sa DOH 7 sa ilang pag-atubang sa media nga daghan pang bakante ang mga tamblanan ug palapdan pa gyong ilang kapasidad.
Mahimong naikog lang silang Galvez ug kaubanan sa pagkurihir ni Bernadas atubangan sa publiko. O mahimong nisabot nga naglikay lang ang lokal nga mga opisyal nga ma-alarma ang mga Sugbuanon apan naningkamot sa pagsulbad sa kakuwang.
* * *
Mas makapa-alarma kon si Bernadas ug ang lokal nga mga opisyal nga nituo niya makumbinser sa ilang kaugalingong propaganda ug mapakyas na hinuon sa pag-atubang sa suliran nga di nila ganahang angkunon.
Di maayong timaan sa kamatinud-anon ang kapakyas nilang Cebu City Edgar Labella ug Bernadas pagtuman sa pasalig sa dinaliang imbestigasyon sa pribadong mga tambalanan nga gipasanginlan sa anak nga si Apple Abarquez nga nibalibad sa himatyon niyang inahan: Adventist Hospital (kanhi H.W. Miller Memorial Sanitarium & Hospital), St. Vincent General Hospital, University of Cebu Medical Center, Chong Hua Hospital Mandaue, Perpetual Succor Hospital ug Cebu Doctors Hospital.
* * *
- Latest
