EDITORYAL - Panalipdan ang inosente

Naabot na sa lamesa ni Pres. Duterte ang kontrobersiyal ang Anti Terrorism Bill ug gipaabot na lang kun pirmahan niya kini o i veto. Ang maong balaudnon usa sa iyang mga priority bills.

Ang maong balaudnon giisip sa mga human rights groups nga instrumento aron pahilumon ang mga kritiko sa gobiyerno ug nakalapas kini sa Konstitusyon.

Ang mga nangusog pagpasar aning maong balaudnon nangangkon nga kinahanglan kini aron mahatagan og ngipon ang balaud tungod ang kasamtangang balaud nga Human Security Act (HSA) kuwang ug di paigo batok terorismo.

Apan samtang tuod wala pa masuwayi kun mas mahimo bang epektibo ang law enforcers batok terorismo pinaagi aning balaura, maayo sab tingaling tan-awon kun ang HAS nga gustong pulihan aning bag- ong balaudnon nasakbangan ba sa paningkamot o pagkugi aron kini nahimong epektibo?

Way eksplinasyon nga gilatag para pasabton ang publiko kun nganong ilisan ug kung asa nagkuwang ang kasamtangang HAS. Dili ba ang balaud para man sa tanan ug dili para lang sa kung unsay gusto sa mga naa sa posisyon?

Samtang tuod sa pagdagan sa panahon nagkataas ug nagkabangis sab ang mga terorista nga kinahanglang atbangan og mga balaud, sakbangan unta kini og lawom nga pagtuon nga kadto ra gyung mga terorista maoy mahasol ug di ang mga yanong katawhan nga maoy buot protektahan sa gobiyerno.

Sagad sa mga terorista dinhi sa Pilipinas nagagikan sa mga kabus nga mga pamilya nga nabiktima sa inhustisya sa mga nangaging mga administrasyon.

Usa kini sa mga angay gyud untang unahon sa pagatiman sa gobiyerno kay sila maoy pas-anon sa tibuok nasud.

Maayo unta og subayon og maayo ni Duterte kining maong balaudnon ug estudyohan kining mga probisyon nga gihulagway nga nakalapas sa Konstitusyon nga magbutang unya sa kaparotan sa mga inosenteng buot niyang panalipdan.

Pirmahan man niya o dili ang balaudnon kun di siya mo veto niini pagkahuman sa 30 ka adlaw, otomatiko kining mamhimong balaud nga kinahanglang sundon.