Lider ug inahan

Sukad sa unang adlaw sa kalibotanong pandemya gipakita ug gipamatud-an ni Gobernador Gwen Garcia ang iyang abilidad isip lider ug inahan sa probinsiya panahon sa krisis.

Isip lider, gipakita niya ang igong katakos ug ka hanas pinaagi sa paghatag og direksiyon sa kampanya aron batukan ug kapugngan ang pagkuyanap sa COVID-19 didto sa kalungsoran ug mga dakbayan sa lalawigan.

Way si bisan kinsa nga makapanulisok niya nga nagmika ug nagpasagad sa iyang responsibilidad.

Ug makita ni sa mga reaksiyon sa publiko diha sa social media. Ang paghatag niya og inadlaw nga report sa kahimtang sa probinsiya naghatag og kahupay sa kalisang nga gibati sa katawhan.

Mamahimong dili tanan ang nahimuot kaniya, apan kabahin ni sa kinaiya sa tawo ug wa na siyay mahimo niini.

Isip inahan, gipamatud-an ni Garcia nga andam niyang buhaton ang tanan aron tabangan ug protehian ang mga molupyo sa probinsiya.

Sama sa usa ka matuod nga inahan nga nagtan-aw sa interest ug kaayohan sa iyang mga anak, andam siyang makig-away.

Dihang gihulga sa usa ka opisyal sa Department of Interior and Local Government (DILG) nga kasohan ug suspensohon tungod sa iyang pagluwat og executive order nga magtugot unta sa backriding sa motorsiklo, mibarug siya ug wala mahudlat.

Nakita sa gobernador ang kalisod sa kahimtang sa mga kabus nga way laing kasakyan niining panahon nga kuwang ang public transportation tungod sa gipatuman nga quarantine protocols sa gobyerno.

Apan taliwa sa iyang paningkamot, limitado ang iyang gahom. Human motingog si Presidente Rodrigo Duterte wa nay mahimo pa ang gobernador gawas sa pagsunod sa mas gamhanan kay kaniya.

Apan dili nang kamahay ang mga Sugboanon niya tungod kay gibuhat niya ang tanan subay sa iyang gahom aron unta ang mga kabus katabangan.

Ang kalisud sa transportasyon nga gi-antus karon sa katawhan tulobagon na sa presidente.

Gihan-ay na sa gobernador ang iyang mga argumento nganong angayan untang tugotan ang backriding sa motorsiklo.

Apan taliwala sa legal nga mga basihanan sa balaud mas gipili man ni Duterte nga dapigan ang DILG.