Lig-ona ang kaugalingon

Diay nindot nga pagtulon-an. Gihagoan nako kini pag-translate ngadto sa Binisaya aron sayon ra nga masabtan sa uban nga dili kaayo makasabot og english.

Kay ang tibuok Sugbo, apil na ang siyudad, nag-General Community Quarantine (GCQ) na man sugod kagahapon, sigurado nga daghan na ang mogawas sa ilang kabalayan. Dili nato usbon ang atong batasan, mag-mask ug mag-social distancing, ug maglimpyo kanunay sa kamot.

Diay mga sugyot nga natan-aw nako nga maayo sab sundon. Dili kuno kita pagpasuwabi pagpaminaw ug pagtan-aw sa mga balita kabahin sa Coronavirus Disease.

Ayaw na pangita’g dugang kasayoran kabahin sa virus kay nasayod na man kita niini, kay makamugna ra kini og pagkaluya sa atong pangisip tungod sa kabalaka. Unya likayan kuno nato ang pagsige’g padala og mensahe nga makapahadlok.

Nasabtan nako nga mao diay nga ang ubang health officers wa na kaayo mobutyag kon pila na ang nangamatay sa virus, ug ang ilang gibutyag ang gidaghanon sa mga nangaayo sa sakit.

Daghan kunong mga tawo nga dili sama nato og kalig-on sa kaugalingon, ug kon makabasa nga daghan na kaayo ang namatay, sila maluya ug dali na hinuon mataptan sa virus.

Duna gani tambag nga maminaw ta og music sa atong panimalay, ug maglingaw ug ibutyag sa mga sakop sa atong pamilya ang mga plano aron        molambo.

Pinaagi kuno pagbaton og malipayon nga panghunahuna, makapalig-on kini sa atong immune system, imbes nga kon magsige ka og hunahuna sa virus, maluya ka ug dali ra mataptan sa virus.

Unya, ibutang sa imong hunahuna nga molabay ra kining maong pandemic pinaagi sa pagbuot sa Ginoo. Hunahunaa nga wa kita siloti sa Ginoo, kondili, gipahinumdoman ra kita niya nga magbinuotan.

Niadtong 1918, ang Kalibutan naigo usab og Spanish flu pandemic nga nakapatay og mga 50 milyones ka tawo. Pagka 1957, miigo usab ang Asian Flu ug mga duha ka milyon ka tawo ang namatay.

Pahimuslan nako ang pagpahinumdom nga dili kita malimot sa pag-ampo, ug ang pagtuman sa paglikay sa virus pinaagi sa mga gitudlo kanato nga paglimpyo, ug dili kaayo mopaduol sa mga tawo nga dili nato kaila.

Karon nga GCQ na ang Sugbo, dili kita mokumpiyansa, ug motabang kita pagbantay nga ang gimando sa kagamhanan matuman. Sama kon magsakay ka og PUJ, badlongon nato ang driver nga mopasakay og lapas na sa gilatid nga gidaghanon, ug wa na matuman ang social distancing.

Pinaagi sa atong pagpakabana, hingpit ra nato nga mabatokan ang gikalisangan karon nga Coronavirus Disease nga nakapatay na og kaliboan ka kinabuhi sa tibuok Kalibutan.