Kalibog sa kapuslanan
Daghang salamat sa nagkasungi nga kasayuran gikan nilang Cebu City Mayor Edgar Labella ug sa iyang mga sinaligan, hangtod karon wa kahatagi ang mga Sugbuanon sa hingpit nga katin-awan nganong wa pa magamit ang Cebu City Quarantine Center (CCQC) kapin na sa buwan human na-inugurahan atubangan sa nagkadaghan nga mga pasyente sa COVID-19 nga nagpabilin sa ilang mga pinuy-anan kay wa pa ikabalhin sa isolation facilities ug busa gikabalak-an nga padayong nanakod sa mga sakop sa ilang pamilya ug mga silingan.
Laing nitumaw nga posibleng hinungdan mao ang kalibog sa kapuslanan sa CCQC.
* * *
Ang katin-awan ni Labella dihang nahinabi ni Annie Perez sa TV Patrol Central Visayas mao nga inay mahibung angay nga malipay ang mga Sugbuanon nga wa pay mga pasyente nga nasud sa CCQC. Kay nagpasabot ni nga ang kasagaran sa natakdan sa Covid-19 way mga timaan sa sakit ug ang pipila nga masakiton naato ra sa pag-atiman sa Cebu City Medical Center (CCMC) ug ubang mga tambalanan.
Nipahibawo si Labella nga ang CCQC gitukod alang sa mga pasyente sa dakbayan nga mopakita og mild symptoms sa COVID-19.
* **
Apan gisukwahi ni Regional Director Jaime Bernadas sa Department of Health (DOH) sa Central Visayas ang pahibawo ni Labella. Matod ni Bernadas ang CCQC usa ka step-down isolation facility.
Gipasabot mi sa taga DOH 7 nga ang atimanon sa CCQC mao ang grabeng mga pasyente sa COVID-19 nga naluwas na sa kakuyaw aron mabakante ang mga higdaanan sa Vicente Sotto Memorial Medical Center (VSMMC) ug ubang mga tambalanan alang sa umaabot nga kritikal sab nga mga pasyente.
* * *
Kinsa man ang nagsulti sa tinuod? Si Labella nga maoy nagpatukod sa CCQC? O si Bernadas nga maoy nihatag sa pagtugot nga makasugod nang operasyon sa kontrobersiyal nga quarantine facility?
Lahi ang nakit-an ni Cebu City Council Minority Leader Nestor Archival sa aktuwal niyang pagsusi sa kahimtang sa CCQC. Si Archival nga usa ka inhinyero niingon nga daghan pa og kuwang nga kahimanan. Apil nang dust control equipment, containment barriers ug pagselyo sa matag usa sa 160 ka lawak aron nga di magtinakdanay ang mga pasyente ug ang mga doktor ug nurses nga mag-atiman nila.
* * *
- Latest
