Nganong wa pa magamit

Ambot kinsay nakahulhog ni Cebu City Mayor Edgar Labella, o tingali nadasig lang sa kapaspas sa Wuhan, China sa pagtukod og mga tambalanan alang sa nagbahang mga pasyente sa COVID-19 sa unang pagsulbong sa pandemiya, nipasalig siya nga mahuman ang pagtukod sa quarantine facility sa North Reclamation Area sud lang sa 10 ka adlaw.

Giluwatan ni Labella ang saad niadtong Marso 19. Nahuman na lang ang Marso wa mahuman ang proyekto. Apan wa ning kapugong niya sa pagsubli sa pasalig hapit matag semana sa Abril nga andam nang quarantine facility nga modawat og mga pasyente.

* * *

Hangtod nga nipahibawo siya nga nahuman na gyong proyekto niadtong Abril 25, kapin sa buwan human sa orihinal niyang pasalig. Sa samang adlaw, gibendisyonan ang quarantine facility ug subling nipasalig si Labella nga andam na silang modawat og mga pasyente sa COVID-19.

Ang nisunod nga mga semana nakasaksi sa paspas nga pagsulbong sa mga kaso sa COVID-19 sa Dakbayan sa Sugbo. Nahibung ang mga Sugbuanon nga ang mga pasyente gipamutang ug naghuot na gani sa pipila ka eskuylahang publiko nga ginganlan na og barangay isolation centers (BICs) ug way bisan usang gipasud sa quarantine facility.

* * *

Gipasabot ni Labella sa TV Patrol Central Visayas nga inay mahibung angayng magpasalamat ang mga Sugbuanon nga way nahatod sa ginganlan na karong Cebu City Quarantine Center (CCQC). Tungod ni kay kasagaran sa mga nag-positibo sa COVID-19 way timaan sa sakit ug ang pipilang masakiton naato ra pag-atiman sa mga tambalanan.

Matud ni Labella ang isud sa CCQC mao rang mga pasyente nga may timaan sa sakit. Lisod sabton sa mga Sugbuanon nganong naghuot nang mga pasyente sa BICs, nga nagnihit ang mga pansayan ug health workers, samtang way nagtikaw-tikaw sa CCQC nga may 160 ka higdaanan, portable x-ray, oxygen, siyam ka doktor ug 50 ka nurses.

* * *

Apan ang katin-awan ni Labella gisukwahi ni Cebu City Medical Center (CCMC) Administrator Yvonne Feliciano. Kinsa niingon nga wa pa silay pasyente kay wa dayon kakuha sa pagtugot sa Department of Health (DOH).

Matod ni Feliciano naabtan sila og usa ka buwan una nakahingpit sa mga panginahanglan sa DOH sama sa tangke sa tubig ug generator.

* * *

[email protected]