EDITORYAL - Hangyo sa de motor

Unom na ka mga mayor dinhi sa Sugbo ang mihangyo nga itugot na ang backriding sa mga motorsiklo tungod kay mao kini ang madalidali sa mga tawo sa ilang transportasyon.

Ning bag-o lang, ang mga opisyal sa Talisay City, Carcar City ug Consolacion nanawagan sa Inter-Agency Task Force on Emerging Infectious Disease nga tugotan ang ilang hangyo.

Una ng mihangyo ang mga mayor sa Cebu City, Mandaue City ug Lap-Lapu City nga i- exempt ang mga magtiayon o managkabanay sa no- backriding policy sa pagsugod sa enhanced community quarantine.

Ang motorsiklo mao ray makaya sa mga kabus nga di kapalit og sakyanan alang sa ilang panginabuhi.

Kun buot bayang hunahunaon, ang magtiayon usa ray pinuy-anan ug sa balay way social distancing.

Reklamo pa sa uban gikuridas ang tanan nga gisusama ang tanan og pasaheroang motorsiklo.

Apan bisan sa mga punto nga ilang gilatag ug mga hangyo, hangtud karon wa kini tuguti tungod sa higpit nga pagpatuman sa social distancing.

Maayo tingali kun kini luagan og gamay para sa mga magtiayon ug mga magkabanay. Kinahanglan lang nga di una kini gamiton isip pamasaheroan.