Bana nga kaduha nagpakasal hayan mag-atubang og kasong bigamy

Dear Atty. Divine,

Ang akong amiga nagpakasal sa iyang boyfriend human kini nabuntis. Di pa sila tantong dugay nga nagkaila og tungod kay nabuntis siya mi-offer kaniya ang boyfriend nga pakaslan siya og misugot usab ang akong amiga. Karon nahibaw-an sa akong amiga nga naa diay laing pamilya ang iyang  bana og siya mismo ang nakadiskobre niini human siya gikontak sa asawa pinaagi sa Facebook. Tulo ka tuig na silang kasal. Apan karon nahadlok ang akong amiga nga iapil unya siya sa pagpasaka og kaso sa unang asawa. Ang akong pangutana kon duna bay tulobagon ang akong amiga nga nagpakasal sa tawong minyo na diay? Daghang Salamat.

Lorna

* * *

Dear Lorna,

Mamahimong mapasakaan og kasong bigamy ang bana sa imong amiga basi sa Article 349 sa Revised Penal Code tungod sa iyang gihimo nga makaduha nagpakasal. Ang ikaduhang asawa mamahimong maapil sa pagpasaka og kaso kon nasayud siyang daan nga minyo diay ang iyang gipakaslan. Apan sa kaso sa imong amiga, wa siya masayod nga minyo ang iyang gipakaslan. Basi sa mga nahaunang desisyon sa Korte Suprema kini nagkanayon nga kon ang ikaduhang asawa way kasayuran labot sa first marriage sa dihang siya nagpakasal then wa siyay tulobagon niini og di siya maapil sa kasong bigamy. Sa ato pa, mamahimong depensa sa imong amiga nga wa siya masayud sa first marriage aron siya makalingkawas sa maong tulubagon. Thanks and God Bless.

Atty. Divine

* * *

 Alang sa inyong pangutana, palihug lang sa pag-email sa [email protected] og akong tubagon ang inyong pangutana pinaagi sa akong column matag Miyerkules, Sabado og Domingo.