Dili sala sa middle class

Gikwestiyon ni Senador Cynthia Villar nganong giapil paghatag og hinabang sa gobyerno ang "middle class."

Alang ni Villar dili angayang makapahimulos sa social amelioration program ang anaa sa "middle class" tungod kay may sweldo ni nga gidawat gikan sa ilang mga kompaniya ug ang uban niini mga kawani sa gobyerno.

Matud niya mao ni hinungdan nganong daghan sa mga kabus ang nahikawan sa gikinahanglang tabang.

Ambot og nitago ba sa langub si Villar niining panahon sa pandemic nga wala man siya masayod nga way gipili ang krisis, tanan apektado.

Bisan ang dagkong mga negosyante naapektuhan. Dako lang og kalainan ang epekto sa krisis ngadto sa mga adunahan ug sa mga kabus lakip na sa middle class.

Kini tungod kay samtang apektado ang mga adunahan, ginansiya ray nawala nila. Apan ang kabus ug ang middle class panginabuhi maoy nahanaw.

Bisan dili mangabli sa ilang negosyo ang mga adunahan dili sila malunsan, apan alang sa mga kabus ug middle class ang usa ka semana nga way trabaho ug way sweldo kalbaryo na kaayo.

Wala ba masayod si Villar nga tungod sa paghunong sa mga patigayon daghan sad sa mga middle class ang way sweldo?

Ug dili intawon ang middle class maoy hinungdan nganong dunay mga kabus nga wala makadawat og hinabang.

Kun gigamit ni Villar ang iyang utok sayon ra kwentahon paigo ba o dili ang kwarta nga gigahin sa gobyerno. Bisan pa og miapil si Villar ug ang iyang pamilya sa midawat og hinabang dili magkuwang ang budget sa gobyerno.

Atong kwentahon aron masabtan sa tanan: Ang gobyerno migahin og P200 bilyones aron pagtabang sa apektado sa pandemya.

Ang Pilipinas dunay gibana-banang population nga 109.5 million. Kun dunay lima ka membro ang matagpamilya, sa ato pa duna say gibana-banang 21.9 million ka pamilya sa tibuok nasud. Sa tag P6,000 nga hinabang sa gobyerno pinaagi sa SAP, P131 billion ray magasto, dili mahurot ang P200 bilyones.

Ang pangutana, hain man paingon ang sobra? Nganong dili man tanan ang gihatagan? Busa ayaw ibasol sa middle class kun dunay mga kabus nga wala mahatagi og hinabang.

Isip Senador sa nasud atong hagiton si  Villar pagpangita hain mopaingon ang kwarta.