Reklamo nagpadayon

Hangtud karon, makabasa pa gihapon kita og mga posts sa social media nga nagreklamo kay dili kuno angay ang pagpanghatag og Social Amelioration Program (SAP) cash assistance.

Ang reklamo nga nabasahan nako nga sa Sitio Panabang, Barangay Apas, may usa ka pamilya nga nakadawat og P18,000 kay tingali tulo ka cash assistance ang gihatag.

Wa na ako masurpresa pa niini kay diri bitaw sa among sitio, may pamilya man nga nagpuyo sa usa ra ka balay, duha ang nakadawat. Ang estorya gani, tulo gyud ang nakadawat.

Samtang ingon niini ang sitwasyon, dunay uban sa among silingan nga wa gyud tawon makadawat og SAP. Wa sab tawon makadawat og hinabang bugas gikan sa siyudad.

Klarohon lang nako nga naingon niini ang sitwasyon kay kadtong mga gitahasan sa pagpanglista, nagtinapolan man. Kon giadto pa nila ang kabalayan sa mga tawo, makita nila kon kinsa gyud ang angay’ng hatagan.

Pero bilib ko sa akong silingan nga nagtrabaho sa Department of Social Welfare and Services (DSWS) sa dakbayan sa Sugbo kay ipauli kuno niya ang P6,000 nga nadawat sa iyang papa.

Giklaro sa mao nga kawani sa DSWS nga dili siya ang nagpalakip sa ngalan sa iyang papa sa listahan sa mga SAP beneficiaries, mao nga iya kining ipauli ang kwarta.

Saludo ko kon iya kining himoon ug ang maong salapi ihatag kini sa uban nga mas nanginahanglan gyud kaayo.

* * *

Naanad na man ko nga dili mogawas-gawas sa balay. Dugay na kaayo nga wa ko’y gawas-gawas, na-weak na gud tawon ang battery sa akong sakyanan kay wa nay dagandagan.

Kini tungod kay kon moadto ko sa Cebu City Hall ug sa ubang mga opisina sa gobiyerno, wa man didto ang mga opisyal. Kon gutomon ka, matagbaw ka’g pangita kon asa mokaon.

Mao nga mas maayo na lang nga mag-standby sa balay. Nakagusto na lang sab ko kay kon magsige og suroy, sus, kada adlaw makagasto gyud. Pero kon ari sa balay, way gasto kay mosud-an ra man ko og mga sagbot, utan ba.

Pero, ugma mapugos gyud tingali ko’g gawas kay nahurot na ang gipalit nakong bugas kaniadtong miaging buwan.

Akong nahunahuna ba nga kon naagwanta man gani nako nga wa mogawas, magdaginot lang, nganong ang uban morisgo man gyud pagsuroy-suroy? Aron gyud mo matakdan sa coronavirus?

Maayo unta kon kining mga tawhana mamatay diretso kon matakdan sila ug dili makapanakod. Apan kini sila kon matakdan, mopauli sa ilang mga gipuy-an og makapanakod pa ngadto sa mga nagbinuotan.