Kun nahigugma kamo kanako

May 17, 2020: Ikaunom nga Domingo sa Pasko sa pagkabanhaw

Mga Pagbasa: Buh. 8;5-17/Sal. 66/1 Ped. 3;15-18/Jn. 14;15-21

Ang gugma ingon nga desisyon usa man ka paagi sa pagkinabuhi. Matang sa pagkinabuhi nga mosangko gyud sa tinud-anay nga katagbawan ug kalipay.

Kalipay nga bisan ang kalibutan dili makahatag sanglit ang kalipay nga kalibutan salingkapaw lamang. Apan ang kalipay nga iya sa Dios dili mahimong hitupngan.

Tinuod gyud kini ug dili mahimong kabayran og bisan unsang kalibutanong butang. Ang giingon sa atong Ginoo nga kun tinud-anay kamo nga nahiugma kanako inyong tumanon ang akong mga sugo ug ang akong sugo alang kaninyo mao nga: “Paghigugmaay kamo!”

Ang pulong Obedience gikan man sa pulong Ob Audire nga nagpasabot og to hear kun makadungog. Ang pagdungog ug pagpanumbaling sa bisan unsang giisip natong mahinungdanon maoy makapadasig nato sa paghimo niini sa mas aktwal nga paagi.

Sama pananglit sa sugo sa usa ka amahan ngadto sa iyang anak. Ang anak nga masinugtanon dili man mopalapos sa pikas dunggan sa iyang nadungog. Hinunoa iya kining himoon aron sa ingon mahatagan og katumanan ang maong mando.

Kining panahon karon sa pandemiya dinhi sukdon ang atong pagkamasinugtanon dili lang sa balaod nga iya sa gobiyerno kondili sa balaod usab nga iya sa Dios. Napadayag ba kaha nato ang atong dakong gugma ngadto sa atong isig kaingon labina sa mga higayon nga gikinahanglan nila ang atong tabang?

O basin baya nga tungod ning maong hitabo nahimong mas maneguro pa nuon kita sa panginahanglan nato kaysa panginahanglan nila nga tungod niini mas sayon ug mas makatarunganon namn hinuon ang pagpamintaha.

Kun maghisgot ta og kinabuhi sa gugma nagpasabot kini nga:

1. Atong gimbut-an nga higugmaon nato ang atong kinabuhi, ang atong isig kaingon, ingon man ang tanan nga tawo. Ang paghigugma nga akong gipasabot mao man ang paghatag og igong pagtahud sa usag usa.

2. Atong gihigugma una ang atong kaugalingon sanglit ang paghigugma sa kaugalingon mao man ang sukaranan sa paghigugma sa uban.

3. Ang bugtong paagi aron mas molungtad pa ang paghigugmaay mao man ang pagpadayag o pagpakita nga angayang sud-ongon ang imong hinigugma (tawo man o pagkinabuhi) ginamit ang mga mata sa kalumo.

4. Ang labing maayong panahon sa paghigugma karong adlawa ug dili ugma kay ang ugma wala namay kasegurohan.

Matag gugma dunay limitasyon. Matag gugma bisan pa man kun dunay limitasyon, sa kanunay gihapon balaanon.