Eskandalo ni Sinas

Naputos ron sa pagsaway ang kadagkoan sa kapolisan human nag-viral sa social media ang mga hulagway atol sa birthday party sa hepe sa National Capital Region Police Office (NCRPO) nga si Major General Debold Sinas niadtong Mayo 8.

Ang hulagway unang gi-post sa Facebook page mismo sa NCRPO. Dali nga niani og mga pagsaway ang maong hulagway tungod kay makita dinhi ang daghang bisita sa heneral nga nakigsawo kaniya alang sa usa ka bangkete taliwa sa nagpadayong pagpatuman sa enhanced community quarantine (ECQ) didto sa Metro Manila.

Ubos sa lagda sa Inter-Agency Task Force (IATF) hugot nga gidili ang pagpahigayon og party ug bisan unsang panagtigom samtang gipatuman pa ang ECQ. Kini maoy nakaeskandalo sa kadaghanan tungod kay samtang sila gidid-an, bisan gani ang pagbilar sa mga minatay dili na mahimo, apan ang dakong opisyal sa kapolisan nga maoy gitahasan sa pagpatuman sa mga lagda sa ECQ yano lang milapas niini.

Nisamot ang eskandalo dihang ang hepe mismo sa kapolisan sa nasud nga si Archie Gamboa miabswelto ni Sinas nga wala man lay bisan respitar nalang nga imbistigasyon. Dali nga nakapanalipod si Gamboa nga wala kunoy kalapasan nga nahimo sa maong panagtigom ug dili kuno kadto maisip nga usa ka party.

Si Sinas nangayo na og pasaylo sa nahitabo apan miinsister nga wala siya makahimo og kalapasan. Gisubay kuno nila ang mga lagda sa ECQ atol sa maong higayon. Matud niya nga igo lang nihimo og mañanita ang iyang mga sakop.

Apan dili ni maoy makita sa hulagway tungod kay tataw nga dunay kumbira ug panag-inom og bino basis a mga botelya nga makita diha sa litrato. Palusot ni Sinas nga edited ug karaan kuno ang ubang mga hulagway.

Dili na hinuon ko matingala niini tungod kay niadtong si Sinas dinhi pa madistino sa Police Regional Office-7 nakabaton na siya sa reputasyon nga labihang ka maayong mangulipas. Nahinumdom pa mo sa mga kaso sa patay nga gidudahang nalambigit ang iyang mga sakop?

Usa sa labing kataw-anan niyang estorya niadto aron tapin-an ang mga pulis nga gidudahang nalambigit sa pagbanhig sa usa ka ahente sa PDEA didto sa dakbayan sa Carcar mao nga naunay ang polis sa iyang kauban dihang kalit nga mibuto ang pusil tungod ka nabuwasot sa liba-ong ang ilang gisakyan.

Mao nga dili na ta matingala sa pamahayag ni Sinas mahitungod niini. Dili hinoon seryoso ang maong kalapasan apan isip mga tigpatuman sa balaud angayan unta nga sensitibo ang kapolisan sa bati-on sa publiko.

Ug labaw sa tanan angayang sila maoy magsilbing ihemplo sa pagsunod sa mga lagda nga ilang gipatuman.