Posibleng kataposan nang sibya
Pagpabaya. Kalimtanon. Nasobrahan nga pagdahom. Tingali usa nila, o kumbinasyon sa duha, o ang tanang tulo maoy hinungdan nga, nahuman na lang ang among sibya sa Arangkada sa DYAB Abante Pa, Bisaya!, way bisan usa nga nakaamgo nga posibleng mao na to ang kataposan namong sibya.
Sa sinugdanan, nahibung ko, dayon inanay nga naglibog, sa wa pa hingpit nga nakugang. Nanaguto ko nganong wa gyoy nahinumdom sa nataligam-an nga hisgutanan--nga mas mahinungdanon sa laing kaliboan ug usa ka isyu nga among natuki--ang pag-abot sa adlaw nga dugay na namong gikahadlokan.
* * *
Pagkahuman gyod sa Arangkada pasado alas-10 gahapon sa buntag (kutob ra unta mi sa alas-9) nakadawat dayon ko og mga pangutana sa among grupo sa Viber kon may Arangkada pa ba karong adlawa, Martes, Mayo 5, 2020.
Dugay kaayo kong nakahunahuna sa kamakahuloganon sa petsa gahapon, Mayo 4, 2020: Nga maoy diay ang kataposang adlaw sa 25 ka tuig nga prangkisa nga nakuha sa ABS-CBN Corporation gikan sa Kongreso. Ug nisunod ang pagkapugwat sa mas pait nga kahigayonan: Nga mahimo diay nga wa na koy trabaho sugod karong adlawa.
* * *
Wa magkuwang ang ubang mga sakop sa media sa pagpahinumdom sa mamahimo namong dangatan:
Gisibya ug gimantala nila ang subling pasalig ni House Speaker Alan Peter Cayetano nga di matak-opan ang operasyon sa ABS-CBN human sa Mayo 4; ug
Gisibya ug gimantala sab nila ang pasidaan ni Solicitor General Jose Calida nga masilotan ang mga tagduma sa National Telecommunications Commission (NTC) kon tugotan ang ABS-CBN nga makapadayon pagsibya bisan way bag-ong prangkisa gikan sa Kongreso.
* * *
Tingali nitidlom ang among pagpakabana tungod sa pasalig nilang Cayetano ug kaubanan nga hatagan mi og kasamtangang pagtugot sa NTC samtang tukion sa House of Representatives ang mga balaudnon sa paglab-as sa prangkisa sa ABS-CBN.
O tingali ang kalibotanong hulga sa Covid-19 maoy sad-an. Tingali sama sa ubang natanggong ug nahulga tungod sa kagaw nga di makita, nakahukom mi nga may mga butang nga mas mahinungdanon kay sa uban. Tingali nakumbinser mi nga mas mahinungdanon ang tinuod nga pag-alagad sa katawhan kay sa pag-ulug-ulog sa mga politiko. Tingali gipili ang pagtuman sa among trabaho kay sa kabalaka unsay among dangatan.
* * *
- Latest
