Kasinatian diha sa kahilom

Wala kaayo igdungog nga si Jose bana ni Maria ang dunay gilitok nga mga pulong sa Balaang Kasulatan. Ang Jose nga atong nabasa nga dunay mga pulong nalibkas mao man kadtong Jose sa kapanahonan sa mga Israelita didto sa Ehipto.

Ang iyang kahilom hinuon wa man magpasabot og kahuyang ug kawalay masulti. Ang iyang kahilom nagpasabot man og gahum ingon man kusog.

Ning panahon sa pandemonyo sa Covid-19 nga gikan sa Wuhan China, atong himoon ang pulong kasinatian ingon nga suikaranan sa atong pagpamalandong:

K o Kasinatian. Ang kasinatian nato karon mao man ang gamhanang magtutudlo natong tanan nga magmatngon ug dili magpasagad. Kay ang kamatayon anaa nagsunod kanato.

A o Ampo. Dili lang kini suliran nga lawasnon kondili ekonomikanhon. Adunay mga butang nga mahimo natong sulbaron nga kita ra apan dunay mga butang nga kinahanglang ihangad nato sa kahitas-an.

S o Subsob ang pagahimoon natong pag-ampo ug pagpursige sa pagpaningkamot aron sa ingon makontrolar kining maong pandemonyo.

Sa laing bahin, gikinahanglanon usab nato ang pagpursige diha sa pagdasig sa tagsa tagsa aron mabatonan nato ang dakong kalig-on aron kita magpadayon sa pagpakabuhi taliwala ning maong kalisud.

I kun Integridad maoy kinahanglanon ning mga panahona aron ang mga katawhan mohatag sa ilang pagsalig labina kun anaa ikaw sa posisyon diha sa public service.

N kun Normal. Unsa kahay normal ning panahona sa? Ang tanan nahimong gipaagi na lang sa online nga tungod niini nasakripisyo ang relasyon sa matag usa labina kanila na dunay mga gihambing balatian.

Kun kaniadto buot kitang moduol ug mohatag sa atong pag-amoma ang mga tawo karong mga panahona nahimong taslakan nga makiglambigit tungod sa corona.

Walay mahimo ang si bisan kinsa nga buot mohangop sa iyang mahal sa kinabuhi. Ang tanan gihulagway diha sa social distancing nga kamanduan matud pa.

A kun Alagad. Kay kinsa ba gud ang magtinabangay kun di kita ra man gyud unta nga naapektuhan niini. Apan ang pulong alagad nahimong daw nataligam-an gumikan sa kamatuoran nga kadaghanan nato karon ang nag-iyahay tungod sa kalisang nga mahutdan ug kawalay kapaingnan.

T kun Tago. Dili sa tanang panahon nga atong ipadayag ang atong katakos diha sa pakig-asdang. Mao nga kinahanglan kita motago mag lockdown diha sa tagsa tagsa nato ka mga panimalay.

A kun Amping. Ayaw tuyoi ang makadaut nimo. Mas maayo nga ampingan mo una ang imong kaugalingon kun laraw mo nga mabuhi ug mabuhi ang imong pamilya. Kay dili ka makahatag og bisan unsa nga wa nimo mahupti.

N kun Nunot sa bisan unsang laraw nga makaayo sa kinabag-an. Ayaw paghimo og imo kun ugaling dili ka seguro sa resulta niini.