Frontliners dapat mahalon

Daghan nang doktor ug nars ang nangamatay tungod sa grabeng paningkamot pagluwas sa mga pasyente nga gitaptan sa kagawng grabe ka mananakod.  Usab, ubay-ubay kanila ang nalanding sa tambalanan, nakig-away sa kamatayon human matakdi sa mga pasyente.

Suwerte kay may pipila kanila naluwas. Apan kon hingpit na silang mamaayo, mobalik na sab pagpakig-away sa panggubatan.

Sila wala mahadlok ni magpanuko pagbuhos sa kinatibuk-an nilang serbisyo ngadto sa katawhan, bahala nag ilang giatubang kanunay ang dakong hulga sa kamatayon.

Usahay, malimtan na lang gani ang ilang oras sa pagkaon tungod sa nag-abot-abot nga mga bag-ong pasyenteng ilang atimanonon nga idugang sa mga daan nga taudtaod nang gialimahan.

Sa laktod, kon unsay alang sa ilang kaugalingon, halos isakripisyo na lang. Dili na gani sila makagakos sa ilang kapikas, ni makahawok sa ilang anak. Ingon niini kabug-at ang krus nga ilang gipas-an.

Apan unsa bay gibawos sa mga volunteers nga naasayin sa main entrance didto sa Sitio Callejon, Barangay Labangon, Cebu City, niadtong nars, kinsa gikan sa iyang gitrabahong ospital, gusto nang mouli sa iyang gipuy-an aron unta makapahulay?

Sa nakuhang video niadtong Abril 23, 2020 nga na-viral sa social media, klaro kaayo ang tingog sa babayeng nars nga nagpakiluoy nga unta pasudlon na siya. Pero bisan pa sa kaputi sa uniporme nga gisul-ob sa nars, imbes irespeto ang kaputli sa iyang hangyo ngadto sa mga nagbantay, gilisodlisod hinuon siya.

Usa sa mga nagbantay madunggan, nga pakuhaon siyag condominium unit o balay nga kapuy-an.

Unya, may mipuno: “Di man sab mi ma-blame, Ma’am, kay daghan sad silingan mangreklamo, Ma’am, ba. Usa pa sad, sa ospital ka nagtrabaho. Moaksiyon gyod og kabalaka ang mga tawo diri.”

Makagisig kasingkasing ang gibuhat sa mga volunteers. Gipasabot na sila sa nars, nga ang mga frontliners sama niya, exempted sa quarantine rules. Nag-uniporme pa gyod siya. Ug may ID pang ipakita, kon nangayo pa ang mga nagbantay.

Miscommunication? Dili tingale. Kay ang unipormeng gisul-ob, makatug-an nga siya nars. Ug nahiapil sa pahibalo nga angayng irespeto: “Please don’t delay.”

Ang nars kaabag sa doktor nga moluwas sa atong kinabuhi kon kita masakit. Dili nato sila i-discriminate, insultohon o pasakitan. Kondili, atong mahalon!