Serbisyo sa Ormoc nga walay tihik-tihik

Sulod lang sa upat ka adlaw na-distribute tanan ang tagsa ka sakong bugas sa mga residente sa Dakbayan sa Ormoc nga maoy gipatuman ni Mayor Richard Gomez.

Wala nay daghan kuskos balongos nga repacking ug lista-lista sa mga molupyo basta kutob sa nagkinahanglan gihatagan bulto sa usa ka sakong bugas.

Nahimo man lagi ni sa Ormoc nganong wala man mahimo sa uban? Dinhi nato makita nga kun gusto moserbisyo ang mga public servant diha-diha dayon madunol gyud dayon ngadto sa katawhan ang tabang.

Sa tinuod lang dalaygon ang gihimo sa Ormoc nga angayan panaminan sa uban mga mga local government units nga unahon ang katawhan kay sa interest sa uban nga gikinahanglan nga ipaagi pa niining mga sinaligan ang pagpang apod apod sa tabang.

Karong panahona gigutom na ang mga tawo ug dili na makahulat ang tiyan nga unya unyaon ang bugas nga itak-ang sa ilang mga kaldero.

Gawas pa sad maproteksyonan ang mga kawani o volunteers gikan sa posibleng pagtakboy sa kagaw kun ma expose sila sa mga tawo panahon sa mga repacking sa relief goods, gawas pa ang kakapoy nga ilang bation nga makapaluya na hinoon sa ilang lawas.

Makasabot kita sa katarongan sa mga LGU nga dili na bulto og palit sa bugas busa giangay angay lang ang distribution sa mga tawo.

Basin mapangitaan og pamaagi kay nahimo man lagi posible sa dakbayan sa Ormoc ang bulto ang paghatag sa tag usa ka sakong bugas.

Kung gusto gyud nga ibulto ang distribution mapangitaan gyud og pamaagi nga mahatod diha diha dayon.

Kini ang serbisyo nga walay tihik tihik, puslan man motabang ihatag nalang ang tanan.

Sa panahon karon kinahanglan idiretso gyud ang tabang ngadto sa katawhan kay kon iagi pa sa uban aw basin dili tibook ang ilang madawat.