EDITORYAL - Di angay mag-panic

Matag adlaw napun-an ang gidaghanon sa mga natakboyan sa coronavirus  sa bisan asang bahin sa kalibotan. Dinhi sa Pilipinas, usa ang Cebu sa nagrabehan tungod kay padayon ang pagsaka sa mga nagpositibo sa maong virus apan kinahanglan bang mag-panic? Dili.

Tinuod ang Cebu City maoy nagrabehan gumikan sa kapin na 470 na ka mga tawong nataptan niini. Apan kadaghanan mga asymptomatic o kadtong mga wala magluya ug walay mga sintomas nga gipamati ang pasyente ug kadtong napaubos na sa test gimonitor ug gibantayan na sa gobiyerno.

Ang coronavirus nakapatanggong sa milyones ka mga tawo sa Pilipinas, apil niini ang isla sa Sugbo. Sa pagpatuman sa ECQ nalimitahan ang paglihok sa mga tawo ilabi na ang pagbiyahe aron mapugngan ang pagkatap. Ang isla sa Sugbo gilangkoban og 44 ka mga lungsod, unom ka component cities ug ang mga highly-urbanized cities sama sa Cebu City, Lapu-Lapu City ug Mandaue City.

Apan kining mga highly-urbanized cities lang maoy dunay daghang mga kaso sa COVID-19, ug sa tulo, ang Cebu City maoy kinadaghanan og pasyente.

Ang Cebu City adunay 80 ka mga barangay apan ang naapektahan lang sa virus mao ang Brgy. Luz,  sunod ang Labangon; Kalunasan (Cebu City Jail); Kalunasan;  Suba; Inayawan; Sambag 2; Mambaling; Guadalupe; Talamban; Sta. Cruz; Kinasang-an; Kasambagan; Cogon-Ramos; Duljo-Fatima; Carreta; Camputhaw; Calamba; Babag 2; Hipodromo ug Capitol Site. Ang mga nagpositibo giatiman na.  Dili tanan nilang sitio aning maong mga barangay ang nataptan maong dili makatarunganon ang diskriminasyon sa mga residente aning mga dapita.

Kaning mga lugara gibantayan na og maayo gani mas daghan na ang nipatuo nga mga molupyo nungka sa mga pipila ka lugas nga magsige gihapon og gawas bisan di importante ang tuyo.

Apan kun gustohon gyud malikay sa sakit, stay at home ra gyud ug mogawas lang kun mopalit og pagkaon ug importanteng panginahanglan.

Ang 25 porsiyento ra sa mga barangay sa Cebu City ang natakboyan ug dili ang tanan busa dili unta angay mag-panic ang mga tawo. Angay pa gani mokooperar ug magtinabangay aron maluwas ang tanan.