Kahakog ug kasina

Daghan ang atong nadiskobrehan niining Coronavirus Disease 19 o COVID-19. Tungod sa COVID-19 atong nadiskobrehan han ang kapasidad sa mga nasud sa kalibotan sa pagtubag sa suliran nga wala nila damha nga moabot.

Sa pagtubag ug paghatag og pamaagi sa pagsulbad sa suliran adunay nasud nga praktikal. Sama pananglit sa nasud nga Italya. Tungod sa kadaghan sa mga tawo nga natakboyan sa COVID-19, wala na sila maato sa pag-atiman sa mga health personnel sa maong nasud.

Kini ang hinungdan nganong wala na nila tambali ug atimana ang mga tiguwang ug gipasagdan nga mamatay.

Mao na lamay ilang gisiguro sa pag atiman ang mga dili pa tiguwang.

Dinhi sa Pilipinas ato nga nadiskobrehan ang kahakog ug ang kamasinahon sa tawo nga maoy nagmugna sa kaguliyang sa pagpang apod-apod sa ayuda sa gobyerno ngadto sa mga apektado sa COVID-19.

Ang ubang tawo sa Pilipinas dili gusto nga mabintahaan kay sila ang gusto nga mamintaha. Sa laktod, mga bintahoso. Dili sila mosugot nga dili makadawat sa ayuda sa gobyerno nga alang lang unta sa labing apektado.

Ang mga dato bisan nagsakay og mahalon nga sakyanan nangisog kay wala apila sa paghatag sa klase sa bugas nga dili gani sila mokaon samtang ang mga pobre nagbalik-balik pod sa pagpaningil sa ilang bahin bisan pa og nakadawat na.

Ang mga masinahon nagreklamo nganong gipili lang sa gobyerno ang gihatagan sa ayuda. Nganong wala kuno sila apila nga apektado man usab kuno sila sa coronavirus. Kini bisan pa man og dili pa sila mapasmo.

Ang kahakog ug kasina mao ang nagmugna sa kaguliyang sa pagpang-apod-apod sa ayuda sa gobyerno ngadto sa mga naapiktohan pag maayo sa COVID-19.

Gawas sa ka hakog ug kasina ato usab nga nadiskobrehan ang kadaghan sa mga tawo sa nasud nga mga gahi og ulo.