Sa pagpanago sa mga tawo

Usa ka higayon niana akong gisuhid ang akong FB account. Sa maong pagsuhid nakita nga ang mga langgam ug mga mananap maoy ni-take over sa mga kadalanan ning panahon sa kwarentinas. Apan sa laing bahin, sa ubang dapit sa kalibutan ang mga langgam ug mga insekto naghimo og kakuyaw ngadto sa mga tawo. Kini tungod kay daghang mga dulon didto sa East Africa ang nidaut sa mga pananom sa katawhan didto. Ang ilang paghugpa dili cute kondili usa  ka dakong peste alang sa mga tawo.

Didto sa Ecuador tungod kay nagpasad man ang mga patay mao nga nitungha ang mga vultures ug tingali gipangkaon na lamang didto ang mga patay. Sa usa ka dapit sa Estados Unidos anaa didto ang mga black crows. Nga tungod niini daw nidulom ang kalangitan gumikan sa ilang kadaghan. Unsa man kahay ipasabot ning tanan?

Hapit na ba ang katapusan sa kalibutan? O nagpasabot ba lang kini nga igo lang gikuha og balik sa mga mananap ang giisip nilang ilaha kaniadto pa?

Sa akong bahin, ingon ini man gyud han-ay kaniadto pa. Sa dihang wala pa maabot ang mga magtutukod og mga buildings nga maoy nihulip sa daghang mga lasang ug maoy niguba sa kinaiyahan sa ngalan sa gitawag nilang kalamboan.

Kini ang hinungdan nganong nahimong daw gi-artificial halos ang tanan tungod kay daghang mga natural resources ang gipangguba ug gipangmina sa mga tawo. Ang sakit niini labina kun ang atong kaugalingong mga mina nga kun buot hunahunaon kita unta ang makapahimulos ang gipangmina naman nuon sa mga langyaw.

Nahitabo kini tungod kay mismo ang atong gisaligan nga manalipod sa atong batakang balaod mao naman hinuon ang nitugot niini kay lagi managhigala sila. Nga sa ato pa diay mahimong gun-obon lamang sa igong kasayon ang atong pinuy-anan gumikan sa utilitarian ug pragmatic nga panghunahuna. Kun atong sumadahon, ginamitay ang show ning mga tawhana.

Nindot paminawon ang huni sa mga kalanggaman samtang nagtagik ko ning maong pamalandong sa terasa sa akong gipuy-an karon.

Ang dagat maagnihon kaayong mikamay kanako aron akong ituslob ang gikapoy kong kalawasan sa iyang makaalim nga tubig apan si Corona nibabag niini. Padayon gihapon siyang nagdala og dimal sa kinabuhi nato karon ug ang gigikanan maoy dakong tunglo alang kanato.

Ang gikinahanglan niining maong tunglo mao man ang pagkontra niini piinaagi og panalangin dili una sa uban kondili kinahanglang magsugod gyud kini sa atong kaugalingon mismo.

Una nato panghingusgan ang atong kalambigitan sa mga langyaw ato unang palig-onon unta ang atong relasyon ingon nga nasud.

Kay kun padayon kitang mag-unay ug magkatibulaag, nan mamahimong mas dali kitang pahimuslan sa mga kaaway nga nagpahipi lamang diha sa bisti sa kaaghop kay hinumdomi dili tanang tabang nagagikan sa kalumo ug kaayo ang uban kanila nagagikan man sa hunahuna sa ginansiya.