Siyam ka libo

Niining panahon sa grabe nga kalisdanan, ang tanan anaa nagsandig sa mga inpormasyon matag karon ug unya mahitungod sitwasyon. Kini ilabina kun ang mga inpormasyon gikan sa lehitimong media outlets sama sa radio, telebisyon ug pamantalaan.

Apan tungod lagi niining pagdominar karon sa social media, wala na nagkadimao ang kamada. Matag gula na gani sa mga post sa Facebook, Twitter ug uban pa, maukay dayon ang kinabag-an. Ug moani dayon kini og mga reaksiyon.

Sama pananglit niadtong post sa usa ka giingong Cebuano artist, kinsa gidakop sa kapolisan gumikan sa iyang Facebook post nga aduna nay 9,000 nga kaso sa Coronavirus Disease o COVID-19 sa dakbayan sa Sugbo.

Ang iyang post mi-refer ngadto sa Sitio Zapatera sa Barangay Luz diin subra sa usa ka gatus ka tawo ang nataptan sa maong makamatay nga balatian, ang labing daghan sa tanang barangay dinhi sa siyudad sa Sugbo.     

Matud pa ni Maria Victoria Beltran, ang Sugbo na kuno ang “epicenter” sa maong pandemic “in the whole Solar System.” Ang maong statement wala mauyoni sa kadagkoan sa City Hall, ilabina ni Mayor Edgardo Labella, kinsa mideklara niini nga fake news.

Apan hugot nga midepensa si Beltran sa iyang post. Matud niya, mismong ang Department of Health ang mideklara nga ang Sitio Zapatera “infected” na sa coronavirus tungod sa ka daghan nga natakboyan niini.   

Sa niaging mga adlaw, gidakop sa kapolisan si Beltran tungod sa alegasyong kalapasan sa balaod sa fake news. Apan daghan ang nag-alburoto sa iyang pagdakop. Kalapasan kuno kini sa freedom of expression tungod kay klaro nga satire kadtong iyang post sa Facebook.

Hinuon katungod ni Betran ug sa iyang kampo nga mosandig sa katarungan nga satire kadtong iyang post sa FB ug nga kabahin kadto sa freedom of expression alang sa matag usa nga nalatid sa atong demokratikanhong Konstitusyon.

Apan adunay katungod usab ang otoridad nga motiyabaw. Kay lagi giyawit sa iyang post nga 9,000 ka positive nga morag nagpasabot nga mao kini ang gidaghanon sa nataptan sa sitio Zapatera. Dili usab malalis nga mamugna kini og alarma sa mga Sugboanon.

Just because nga giingong sa DOH nga “infected” sa COVID-19 ang Sitio Zapatera wala nagpasabot nga natakboyan na ang 9,000 ka molupyo niini. Pareha ra kana kun moingon ka nga ang Sulu usa ka Abu Sayyaf-infested area, apan wala kana nagpasabot nga ang matag molupyo sa maong lugar puro sakop sa bandidong grupo. 

Ambot kun satire ba kaha kadtong post ni Beltran. Kun akoy pangutan-on, wala ko nahimuot o na-entertained ---duha ka importanteng butang nga nag-ila nga satire ang usa ka post or article. Apan ato kining biyaan ngadto sa korte nga maoy modesider.