Angay ba nga silotan?

Sad-an ba gyud ang babaye nga gidakop sa kapolisan kay nag-post sa social media nga adunay kapin sa 9,000 ka lumolupyo sa Sitio Zapatera, Barangay Luz nga napositibo na sa Coronavirus Disease?

Apan sa akong pagtimbangtimbang, ang pamahayag sa 58-anyos nga si Maria Victoria Beltran, gibasi lang sa pamahayag ni Cebu City Health Officer Daisy Villa, ug wa siya magtumotumo.

Tinuod nga wa moingon si Dr. Villa nga kapin sa 9,000 ka lumolupyo sa Sitio Zapatera ang napositibo sa Covid19, apan susama ra niini ang iyang gipasabot kon sabton nimo ang iyang gisulti sa media.

Mabasa nato sa balita nga si Dr. Villa miisip na sa kinatibuk-ang Sitio Zapatera, Barangay Luz nga “na-infected” na kuno sa virus. Unya kay ang maong sitio gipuy-an man og kapin 9,000 ka tawo, mao kini ang iyang gipasabot.

Nakahinuktok man gani ko kay si Dr. Villa miingon nga dili na kinahanglang ipahigayon pa ang massive Covid19 testing sa maong dapit. Nakaingon ko nga unsa na man lang diay, Huwaton na lang nga mangamatay ang mga tawo?

Maayo gani kay pagkaugma, gibutyag ni Mayor Edgar Labella nga ipadayon gihapon ang Covid19 massive testing sa Sitio Zapatera. Para nako, angay nga magmatngon si Dr. Villa sa iyang mga ipanulti.

* * *

Gidayeg nako si Konsehal Renato “Junjun” Osmeña kay migahin gyud siya paghatag og tabang sa mga kabus nga pamilya gikan sa iyang sweldo, sama sa bugas ug ubang matang sa pagkaon.

Tungod niini, dunay iyang mga higala nga misuporta kaniya ug mas daghan na ang iyang natabangan.        Mao kini ang gusto nako sa usa ka opisyal sa kagamhanan nga dili kay ang sulti maoy pabuhaton. Kini si Konsehal Junjun, ang buhat maoy iyang gipasulti.

Angay nga ang ubang konsehal ug mga politiko, mosundog sa gihimo ni Konsehal Junjun. Dagko kaayo sila og sweldo mao nga dili sakit alang kanila ang paggahin og tipik lang sa ilang kinitaan.

Ako gani nga wa na’y trabaho, nakagasto man paghatag og bugas sa duha nako ka silingan nga nanginahanglan, ang usa niini PWD. Bisan og pobre ko, apan gikalipay nako nga nakatabang ko bisan og gamay.

* * *

Nagtuo gyud ko nga daghan ang mga sama kanako nga pobre nga dili makaantos kon molungtad pa og dugay ang pagpatuman sa quarantine kay sigurado man nga mahutdan sila og pagkaon.

Mao nga tumanon nato ang awhag nga dili kita magsuroy-suroy aron nga malikayan nga makatakboy ang virus, ug sa ingon anam-anam ra nga mahanaw kining sakita dinhi sa atong nasud.