EDITORYAL - Ginagmay’ng kadaugan

Makapabuhi og dugo sa katawhan ang mga balita matag mag-update ang Department of Health sa gidaghanon sa mga nangaayo nga mga pasyenteng natakboyan sa sakit nga coronavirus (COVID-19) bisan usa o pipila lang ka buok kada adlaw.

Apan subo lang kay matag adlaw niining panahon nga wala pa makab-ot sa gobiyerno ang gitinguha niining “flattening of the curve” sa maong pagpanakod sa  maong virus mas daghan pa ang nangatakboyan kun itandi sa gidaghanon sa mga nangaayo.

Niadtong Domingo ang DOH mipahibalo nga adunay 40 ka mga pasyenteng nangaayo ug nahimo na karong 197 ang tanang pasyenteng nakasugakod sa maong sakit.

Apan 50 sab ang nangamatay mao nga miabot na tanan og 297 ang mga nakalas sa tibuok nasud sukad nga kini nadiskubrehan  niadtong Enero .

Makapaguol ang padayong pagsaka sa gidaghanon sa mga nag-positibo ug sa mga nangamatay kada adlaw. Dugangan pa ang nagkagrabeng dili maayong epekto  sa virus sa ekonomiya sa nasud.

Apan bisan pa man niining makaguol nga sitwasyon, kun may balita nga dunay usa o duha ka mga pasyenteng nangaayo dako na kaayo kini para sa tanan.

Bisan kadtong mga tawong gahi kaayo og ulo ug supakero sa gipatumang enhanced community quarantine, malipay man gani sab kun makadungog og balitang dunay nangaayong pasyente.

Mga ginagmay kini nga kadaugang angay ipasalamat tungod kay wala pa tanto talikdi sa Ginoo ang katawhan gikan niining maong pagsuway.

Apan dili unta paabuton sa uban nga mawad-an og bili ang paningkamot sa gobiyerno ilabi na sa mga frontliners gumikan lang sa ilang pagkagahi og ulo nga dili mopatuo sa gipatumang protokol.

Hangtud nga dili makab-ot sa gobiyerno ang tinguhang magkagamay ang gidaghanon sa mga magpositibo gikan sa mga patients under investigations (PUI) ug persons under monitoring, magpadayon kining katalagman sa katawhan busa mopatuo unta ang mga tawo nga dili maggawas-gawas sa balay kun dili kinahanglan.