Pagsaka ug pagtiglom

Sulod na sa pipila ka semana, ang Estados Unidos maoy labing daghang kaso sa Coronavirus Disease o COVID-19 sa kalibotan. Sa akong pagsulat niini, kapin sa 336,000 ka tawo ang nataptan sa maong balatian.

Ikaduha ngadto sa ikalima sa listahan ang mga nasud sa Europa, diini grabe nga midaro ang maong makamatay nga virus, nga grabe usab nga nakalupad gikan sa China diin una kining nadiskobrehan sa niaging tuig.

Sunod sa Estados Unidos mao ang Spain diin adunay 131,000 kapin ka kaso sa COVID-19. Sunod niini mao ang Italy nga mitala og 128,000 kapin ka kaso ug nga adunay labing daghan nga patay sa maong sakit sa kalibotan.

Misunod ang Germany ug France nga maoy nagsira sa listahan sa Top 5. Subra na sa 100,000 ang natakboyan didto sa Germany samtang subra na usab sa 92,000 ang naigo sa coronavirus didto sa silingang nasud sa France.

Sa mortality rate, nag-una ang Italy diin aduna nay kapin sa 15,000 ang namatay sa maong balatian. Misunod ang Espanya nga adunay subra sa 12,000 ang namatay ug Estados Unidos nga adunay dili momenos 9,600 ang nawad-an sa kinabuhi.

Samtang didto sa France, mokabat na sa 8,000 ang namatay sa COVID-19. Ang United Kingdom adunay 5,000 ang namatay ug moabot usab sa 3,800 ang namatay didto sa Iran, ang nasud didto sa Middle East nga maoy grabeng naigo sa maong virus.

Hinuon, didto sa China, nga maoy epicenter sa maong virus sa nangaging mga bulan, mihinay na ang mga kaso infection. Sumala sa rekord, mas paspas ang pagsaka karon sa bag-ong didto sa Amerika, Europa ug ubang kanasuran.

Daghan ang natingala niining kalit nga pagtiglom sa numer sa gidaghanon sa mga bag-ong nataptan didto sa China. Ang kaniadto gatusan ang nataptan sa maong sakit matag adlaw, karon grabe na ang pagkunhod sa mga bag-ong kaso.     

Resulta ba kaha kini sa grabe ka estrikto nga lockdown sa kagamhanan sa China didto sa Wuhan ug ubang mga lugar nga naigo sa virus? Kun mao kana, epektibo ang maong lakang tungod kay wala kaayo kadulot ang virus sa ubang mga urban areas sama sa Beijing ug Shanghai.

Apan adunay nagduda sa data nga gipagawas sa China. Matud sa uban, klaro kuno nga gidoktor ug gikontrol sa komunistang rehimen ang data aron lagi nga ipakita sa kalibotan nga milampus ang China sa kumbati niini batok sa maong sakit.

Ambot unsa kaha ang tinuod nga score.