Diha sa kahilom

ABRIL 5, 2020: Domingo sa pagpasakit sa atong Ginoo

Mga Pagbasa: Is. 50;4-7/Sal. 22/Fil. 2;6-7/Mt. 26;14-27;66

Matag sulod nato sa Semana Santa mamahimong alegre ang mood niini pagbendita pa lang daan sa mga lukay ug palma.

Daghan ang  mga tawo ingon man mga bata. Dunay mga tawo nga nagsul-ob sa mga apostoles, maghuot gyud ang mga simbahan bisan asa.

Apan karon lahi ra gyud kaayo kini tungod kay ang mga tawo nahimong hilom lang gyud kay tua man sila sa ilang tagsa tagsa ka mga panimalay ug kun may internet mamahimong motambong sila via live streaming sa mga kalihukan sa parokya.

Sa laktod, dako gyud kaayo ang epekto ni Coronavirus Disease sa atong pagsaulog sa Semana Santa.

Karon sa akong tan-aw nahimong mas sober ang atong pagsaulog niini, hilom ug dili grandiyoso apan solemne.

Alang kanako, sa dihang gihimo ni Papa Francisco ang Iyang Ubi et Orbi nga mensahe alang kanatong tanan, sa dihang naglakaw siya nga nag-inusara sa St. Peter’s Square nga way kisaw, akong nakita ang tinud-anay nga dagway sa simbahan sukad pa sa sinugdan. Ang simbahan dili gingharian nga pinasikad sa tawhanong pagsabot kondili gingharian nga nagasukad sa Diosnong kayano.

Apan ning maong kayano ug kahilom sa atong pagsaulog sa Semana Santa, atong makita ang bili sa pamalandong.

Daghan na ang nausab apan sa dihang nagpangita si Obi Wan Kenobi sa planeta nga nawala.

Ang bata nga padawan nagkanayon nga mas maayo nga iyang sutaon ang sentro sa gravity kay tua didto ang planeta nga iyang gipangita.

Ang Dios mao ang kusog nga maoy nikonektar sa tanan libot kaniya.

Ning panahon sa pandemiya siya unta ang mamahimong kusog nga maglig-on kanatong tanan.

Siya unta ang atong duolon, siya unta ang atong sangpiton. Kay sa atong pagpunay og saba saba ug pagbungat og mga way hinungdang mga pulong atong nakita nga ang atong kaugalingong nga mas nahisalaag kun unsay maayo ug unsay makaayo alang sa kadaghanan.

Ning panahon sa Pandemic atong pasibawon ang atong singgit nga unta kita sa Dios kaloy-an gikan ning maong katalagman.