Ang mga kalibog

Daghan ang naglibog ug wala makasabot sa gipatuman nga Enhanced Community Quarantine (ECQ) ug sa tabang nga gipaabot sa gobyerno ngadto sa mga naapektohan sa Coronavirus Disease o COVID - 19.

Daghan ang naglibog ug wala makasabot sa gipatuman nga ECQ ug sa gipaabot nga tabang ngadto sa mga naapiktohan tungod kay ang patakaran, sistima ug ang mga nagmugna niini otro usab nga makalibog ug daghang naglibog ug wala magkasinabot.

Sama pananglit sa pamahayag sa mga sinaligan ni Mayor Edgardo Labella nga mga abogado nga sila si Floro Casas Jr., Joey Daluz ug Raymund Alvin Garcia.

Si Daluz miingon nga kadto lamang pinakaubos nga hut-ong sa katilingban ug grabing naapektohan ang hatagan sa ayuda nga gikan sa siyudad. Ang mga dato ug adunay mga trabaho dili hatagan.

Busa kay ang barangay man ang gitahasan sa pag apod-apod, ilang gideterminar kinsa kadtong pinakaubos sa hut-ong sa katilingban ug grabing naapektohan. Kay misunod sa mando sa sinaligan sa mayor, wala iapil sa hatagan ang mga dato ug adunay mga trabaho.

Apan lain ang sulti ni Casas. Iyang giingon nga ang tanan makadawat ug walay pilion. Apil sa makadawat ang tag-iya sa balay, mga nag-abang lamang ug mga magtiayon nga wala pay anak.

Dugang sa mga kalibog ang gidaghanon sa bugas nga miabot sa barangay tungod kay dili kini kaigo sa gidaghanon sa mga tawo nga pahatagan sa gobyerno ni Labella.

Ang patakaran, sistima ug mga nagmugna nga naglibog magbunga gayod og mga kalibog maong ang mga nakasabot wala na magbagutbot. Apan ang wala makasabot namalikas ug nangreklamo ngadto sa mga opisyal sa barangay.

Pagkaluoy sa mga opisyal sa barangay, maoy nanagang sa makalibog nga patakaran, sistima ug sa mga naglibog nga mga nagmugna niini.